بندغی حق آتا ایکٹیوسٹ و بلوچ یکجہتی کمیٹی نا باسک گلزادی بلوچ ئے زندان ئٹی اسہ تو ئس پورو مسک، ہندن تھری ایم پی او نا رد ئٹ دزگیری ٹی پین اسہ تو ئس ودھفنگا۔
بندغی حق آتا کارکن گلزادی بلوچ ئے 7 اپریل آ پاکستانی لشکر و ڈھکوک ادارہ آتا کارندہ آک بیگواہی آن بارنگا دزگیری آن گُڈ کیہی ساہت اسکان نادرستو جہہ ئسے آ تخاسُر۔
بی وائی سی نا رد ئٹ گلزادی بلوچ ئے سی ٹی ڈی نا اوسر و پولیس زوراکی ئٹ دریر۔ کیہی ساہت اسکان اودے نادرستو جہہ ئسے آ تخنگا، و ہدہ جیل آ ہتنگ آن مہالو سی ٹی ڈی نا نرینہ کارندہ آتا دو آن اودے سخت لٹ ئہ کٹ کننگا۔
بی وائی سی بیان ئٹی پارے کہ گلزادی بلوچ آ چھار ساہت آن زیات بدنی وڑ ئٹ لٹ ئہ کُٹ کننگا۔
گلزادی بلوچ زندان آن نوشتہ مروک خط ئسیٹی تینے آ لٹ ئہ کٹ نا یاتی ئے کرے کہ اونا دو تے تفِسہ اوڑا کیہی ساہت اسکان لٹ ئہ کٹ کننگا۔
بلوچ یکجہتی نا راہشون ڈاکٹر ماہ رنگ بلوچ تون اوار گلزادی بلوچ، بیبو بلوچ، بیبرگ بلوچ و شاہ جی صبغت اللہ کیہی تو آن بندی ءُ۔ دا وخت ئٹی اوفتے آ لٹ ئہ کٹ نا تدینیک رپورٹ مسنو۔ بیبو بلوچ ئے گدرینگوکا دے تیٹی سخت لٹ ئہ کٹ کننگ آن گڈ پشین جیل آ دننگاسس۔
بی وائی سی نا مہبر آتا تھری ایم پی او نا رد ئٹ دزگیری ئے چرجوئی ئٹ ودھفنگ مننگ ئٹی ءِ۔ عدالت نا حکم آتے آن پد ہم مہبر و باسک آتا آجوئی منکن مننگ ئٹی اف۔
بلوچ یکجہتی کمیٹی نا پاننگ ءِ کہ مہبر و باسک آتے کالونیل تھری ایم پی او نا رد ئٹ ہدہ جیل کوئٹہ و بلوچستان نا ایلو زندان آتیٹی وے قانودی زندان ئٹی تخنگانے۔
او پاریر کہ دا وے قانودی دزگیری نا برخلاف تنظیم عدالت آ ہنانے و قانودی وڑ ئٹ تینا مہبر آتا کیس آتے عدالت ئٹی دائر کرینے۔ ولے عدالت گدرینگوکا ارا تو آن دا کیس آتیٹی چرجوئی ئٹ ہرے کننگ نا چم ئے کارمرز کننگ ئٹی ءِ۔ ہندا وخٹ ئٹی اسہ انگا بینچ کیہی وار سماعت کرینے و ہر وار سرکاری وکیل ننا مہبر آتا برخلاف ثبوت ہتنگ ئٹی بے سوب مسنے۔ داڑان پد ہم جج فیصلہ ئے بنفنگ ئٹی ہرے کننگ ئٹی ءِ۔
