انڈیا نا ڈنی وزیر جے ایس شنکر پارینے کہ اگہ انڈیا نا برخلاف فوجی کاروائی کننگا تو دانا اُسل سختو ورندی ئس تننگو۔
جے ایس شنکر دا ہیت ئے ایران نا ڈنی وزیر عباس عراقچی تون اوڑدئی نا وخت آ کرے، ہرا اینو سہب ئنا انڈیا نا دورہ آ رسینگانے۔
انڈیا نا ڈنی وزیر پارے کہ 22 اپریل آ پہلگان جلہو آن پد انڈیا 7 مئی آ سیم آن ہیمون جلہو کرِسہ دہشت گرد آتا ٹھکانہ تے ٹِک کرے۔
جے ایس شنکر گیشتر پارے کہ نن جیڑہ آتے گیشتر کننگ خواپنہ، ولے اگہ ننا برخلاف فوجی کاروائی کننگا تو نن دانا اسل سختو ورندی ئس ایتون۔
جے ایس شنکر ایران نا ڈنی وزیر عباس عراقچی ئے پارے کہ خڑک ئنا سنگت نا وڑ ئٹ دا المی ءِ کہ نمے حالیت آتا جوانی ئٹ سرپندی مرے۔
خیال ئٹ مرے ملخدو ننکان انڈیا نا کنڈ آن پاکستان نا جتا علاقہ آتیٹ جلہو آن گُڈ درے نن، 7 و 8 مئی نا نیامیکو نن دوارہ پاکستان نا جتا علاقہ، لاہور، گوجرانوالہ، چکوال، اٹک، راولپنڈی، بہاولپور، میانو، چھور و کراچی ٹی انڈیا نا کنڈ آن 12 ڈرون جلہو کننگانے۔
پاننگک کہ غُٹ آن زیات نسخان میانو، چھور و لاہور ئٹ مسنے ہراڑے اسہ فوجی ہدف ئسے ٹِک کننگاسس ہرا نا بھرم ئٹ چھار پاکستانی لشکر نا کارندہ مرگ ئنا گواچی، و پین اِرا شاری کھسکنو۔
یات مرے ملخدو ننکان انڈیا نا میزائل جلہو ئٹ 26 بندغ کھسکسُر و 46 ٹپی مسوسُر۔
