بلوچستان نا دریابی ضلع گوادر و تحصیل پسنی آن پاکستانی لشکر 7 بلوچ ورنا دزگیر کننگ آن گُڈ بیگواہ کرینے۔
شابیتی حوال تا رد ئٹ گوادر نا علاقہ کنٹانی آن 5 مئی آ پاکستانی لشکر شش ورنا دزگیر کرینے ہرافتا چاہنداری نذیر احمد ولد رحمت اللہ، لیاقت علی ولد محمد انور شاہوانی، حکمت اللہ ولد عزیز اللہ شاہوانی، وزیر احمد ولد رحمت اللہ، ممتاز علی ولد محمد اسماعیل شاہوانی و اقبال ولد غلام رسول شاہوانی نا پن ئٹ مسنے۔
پن کروک غُٹ ورنا تا تعلقداری ضلع خضدار نا علاقہ نال آن ءِ و غُٹ مزوری کریرہ۔
ایلو کنڈ آن 6 مئی آ پسنی نا علاقہ ریک پشت آن سرتاج ولد صالح محمد پنیئو اسہ پین ورنا ئسے پاکستانی لشکر اسہ دکان ئسے آن دزگیر کننگ آن گُڈ بیگواہ کرینے۔
سرتاج پسنی نا جہی بندغ ئس ءِ و مچھی ہلنگ نا کاریم کیک۔
