بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک تینا درشان ئٹ پارینے درو پنچ مئی نا نن بلوچستان لبریشن فرنٹ نا سرمچارک ویگہ نا 6:30 آ گوادر نا علاقہ تلار ئٹ ساڑی اسہ پولیس چوکی ئسے آ جلہو کریر و چوکی ئے ہشار، سرمچارک پولیس کارندہ غا تا سلاہ و ایلو مڈی تے دوئی کرِسہ تینتو دریر۔
جارکش پارے کہ پولیس نا دا چوکی گاڑی تیان بھتہ ہلنگ کن جوڑ کننگاسس ہراڑے تیل ئنا کاروبار کروکا جہی بندغ آتا گاڑی تیان بھتہ ہلکرہ۔ الس ئنا غاو ئنا سوب آن سرمچارک دا پولیس چوکی آ جلہو کرسا اودے ہشار ولے پولیس کارندہ غاتے بلوچ مننگ نا سوب آن ہچ وڑ ئنا جانی نسخان تتور ولے اوفتے خبڑدار کرسہ یلہ کریر۔ سرمچارک دا وختا کل جہی اُلاخ آتے رکھ ئٹ روانہ کریر۔
ترجمان ودیک پارے کہ ہندا نن سرمچار آتا اسہ پین ٹولی ئس ریکانی کراس نا جہہ آ جاسوسی کن خلنگوک زونگ ٹاور نا مشین تے ہشِسہ بھس کریر۔
دا کاروائی تیان پد سرمچارک تینا ٹھکانہ نا پارہ غا ہننگ اسر کہ کلک نا جہہ آ کوزہ گیر پاکستانی لشکر تون ڈک کُنگر و ہنداڑے جھڑپ بناء مس ہرانا سوب آن کوزہ گیر لشکر ئے جانی و مالی نسخان ہرفوئی تما۔
اونا پاننگ اس کہ 6 مئی آ نیمروچ نا دو بجہ غا بی ایل ایف نا سرمچارک کیچ ئنا علاقہ زامران ئٹ کوتان نا جہہ آ کوزہ گیر پاکستانی لشکر نا اسہ چوکی ئسے آ جلہو کریر۔ جلہو ئٹ سرمچارک اسنائپر ئٹ ٹِک کرِسہ اسہ کارندہ ئسے مرگ ئنا گواچی کریر۔
او ایسر ئٹ پارے کہ بلوچستان لبریشن فرنٹ دژمن نا برخلاف دا جلہو تا زمہ واری ئے ہرفک و بلوچستان نا آجوئی اسکان تینا جلہو تے برجاء تخنگ نا عزم ئے بھیرو کیک۔
