بلوچ نیشنل موومنٹ نا جارکش برطانیہ نا پارلیمنٹ ئٹی بلوچ نسل کشی نا برخلاف برجاء اِنگا بلوچ لانگ مارچ نا مُختفی ٹی پیش کروکا جان میکڈونل نا قرارداد ئے بخیر کرسا برطانوی پارلیمنٹرین آ تیان اونا تیوعہ مُختفی کننگ نا خواست کننگا ۔
نن جان میکڈونل ، دا قرارداد نا مُختفی کروکا جماعت آتیٹی لیبر پارٹی ، اسکاٹش نیشنل پارٹی ، ڈیموکریٹک یونینسٹ پارٹی و کُل برطانوی پارلیمنٹیری تہ منتوار اُن ہرافک انسانیت نا حق ئٹی تینا توار ئے بُڑز کریر ۔ دا برطانوی اُلس ئنا وقار نا مسئلہءِ انتئیکہ اوفتا ٹیکس ئنا پیسہ آتا انسانیت نا برخلاف جرائم آتیٹ اوار ریاست پاکستان نا کمک کننگک ۔
درشان ئٹی پارینو کہ بلوچستان نا حالیت بلوچستان آ پاکستانی قوضہ نا سوب آن خراب مسُنے ۔ بلوچستان ئے ہنوکا 75 سال آتیان غلامی نا خراب انگا دور آن کشنگ کن جہانی توجہ و کمک نا بکار ءِ ۔ داسا وخت بسُنے کہ بلوچ راجی آجوئی نا تحریک ئے براہ راست کمک کیر ، امریکہ ،برطانیہ ، یورپی یونین و اقوام متحدہ نا نمائندہ آ تیان اُمیت ءِ کہ او بلوچ آ تا حق ئٹ مرور ۔
جارکش پارے کہ زوراکی ئٹ بیگواہی و بیدس عدالت آن خلنگ بلوچستان ئٹی بندغی حق آ تا کُل آن بھلا خلاف ورزی ءِ ولے دافتان تیوعہ حالیت چائنگ مفک ، بلوچستان مروک آ ظلم آتا بھلو فہرست و تاریخ ئسے ، اونا ہُننگ و خواننگ آن بیدس بلوچستان نا مسئلہ نا حل ممکن افک ، بلوچ تینا راجی خودمختاری و تینا سرزمین آ تیوعہ اختیارئے خوائک ۔
او پاریکہ بلوچستان آ قوضہ آن پد بلوچ آتے اوفتا بنیادی حق آ تیان محروم کننگانے ، ہراڈان بلوچ آ تا چاگڑدی تنزلی مسُنے ۔ اینو ہم بلوچ راج قرون وسطی نا زندئے گدریفنگ ءِ و ہر حوال ئٹ پسماندہ ءِ۔ بلوچ راج ئے ترقی آن توننگ کن اوفتا معیشت ئے بھُس کننگا ، معدنی وسائل آ تا لُٹ و پُل مننگ ءِ ، سمندر آ تیٹ غیر قانونی ٹرالنگ نا چھوٹ تننگ ئٹ سمندری حیات آ تا نسل کشی کننگ ءُ ، گڈانی شپ بریکنگ یارڈ آ تا ذریعہ ئٹ زرخیز سمندر ئٹی آ لودگی کننگ ءُ ، وہوکا دریا تیا ڈیم جوڑ کننگ ئٹ زمین آ تے بنجر کننگ ءُ ، داڑان زیر زمین دیر نا ذخائر آ تیٹ کمی مننگءِ ۔ اگہ بلوچستان آ پاکستان نا زوراکی ئٹ قوضہ بروکا منہ سال ئسکان برجاء مس تو بلوچستان ئٹی اِسہ بھلو بندغی المیہ ئس ودی مرو ہرانا خطہ آ ہُرے اسکان منفی اثر مرو ۔
بی این ایم نا جارکش پارے کہ بلوچستان ئٹی راجی آجوئی کن پاکستانی جبر و لشکر کشی تیان پد ہم تینا پرایمن جدوجہد نا کسر ئے یلا کتنو ولے ریاست پاکستان مُدامی حیلہ و بہانہ تیٹ پُرایمن جدوجہدئے ختم کننگ کن بلوچ سیاسی باسک آتا ظلم کننگ ءِ ،بی این ایم نا وڑ انگا پُرایمن جماعت نا راہشون و باسک آ تے سد آ تیٹ شہید کرینو،کیہی باسک آک سال آ تیان بیگواہ ءُ ۔ ننے بندغی حق آ تا خراب انگا حالیت آن پیشتمنگ کن جہانی ایلم تہ کُمک بکار ءِ ۔
چین ، سعودی عرب ،متحدہ عرب امارات و دنیا نا ایلو ملک آک باید کہ او بلوچستان ئٹی پاکستان نا حق ئٹی سرمایہ گزاری و اودے فوجی و مالی کمک کننگ آن پہریز کیر ۔
