نوشکی ئٹ ٹینکر ئٹی خاخر لگنگ نا تدینی ٹی بیران مروکا تا کچ 20 مس۔
بلوچستان نا ضلع نوشکی ٹی 28 اپریل آ اسہ ٹینکر ئسے ٹی خاخر لگنگ آن ٹپی مروکا کیہی بندغ آک علاج نا وخت آ بیران مسنو۔ بیران مروک آتا کچ دائسکان 20 مسنے۔
تدینی آن پد علاج نا وخت آ بیران مروک بندغ آتا خاہوت آک فریشانی نا درشانی کرینو علاج نا آسراتی تیا بےجاراتی نا درشانی کرینو۔
ترینی ٹی بنداوی وڑ ئٹ بیرہ ٹینکر نا ڈرائیور بیران مسس، واہم پدان ٹینکر ئٹ مروک تراک آن کیہی بندغ آک ٹپی مسوسر ہرافتان مُسہ بندغ تدینی نا 24 ساہت ئٹ ساہ تسوسر۔
بھاز ٹپی مروکا تِہ بنداوی جانجوڑی کمک نوشکی ئٹ تننگ آن گُڈ کوئٹہ غا رادہ کننگاسس، و 20 آن زیار بندغ ئے سی ون-30 جہان ئٹ کراچی نا اسپتال آتیا رادہ کننگاسس، ہراڑے دا منَہ دے ئٹ کیہی بندغ آک ساہ تسنو۔
نوشکی پولیس نا رد ئٹ دائسکان 19 بندغ نا بیرانی پک مسنے، واہم بلوچستان اسمبلی نا باسک غلام دستگیر بادینی اسمبلی مجلس نا وختا پارینے کہ بیران مروک بندغ آتا کچ 20 ءِ۔
او کراچی نا اسپتال تیٹ خاہوت آتون بد سلوکی و علاج ئٹ بے سوبری نا درشانی کرینے و حکومت آن دمدستی نوٹس ہلنگ نا خواست کرینے۔
دا تدینی ہموتم مس ہراتم نوشکی نا ٹرک سٹینڈ آ ویلڈنگ نا وختا اسہ ٹینکر ئسے ٹی خاخر لگا۔ دا وخت آ شوکت علی پنیئو اسہ اسہ ڈرائیور ئس ٹرک ئے آبادی آن مُر درے تاکہ بھلو نسخان ئسے آن رکھنگ مرے و دا وخت آ او بھاز ٹپی ہم مس۔ ٹینکر نا اسل ڈرائیور گاڑی آن پیشتمنگ کتو و ہموڑے ساہ تس۔
ٹینکر ئے آبادی آن مُر کشوک شوکت علی ہم کراچی نا اسپتال ئسیٹ علاج نا وخت آ ساہ تسنے۔ شوکت علی تینا ساہ ئنا پرواہ ئے کتو و خاخر لگوک ٹینکر ئے آبادی آن مُر درے تاکہ شاریک بھلو نسخان ئسے آن رکھوک مریر۔
آبادی آن پیشن ہراتم مخلوق خاخر ئے کھسفنگ ئٹ آختہ اس تو ٹینکر ئٹ بھلو تراک ئس مس ہراڑان شوکت تون اوار 60 آن زیات بندغ ہُشنگِسہ ٹپی مسُر۔ اندا ٹپی مروک آتیان دائسکان 20 بندغ کھسکنو۔
