بلوچ یکجہتی کمیٹی اسہ بیان ئسیٹی پارینے کہ تنظیم نا بنجائی راہشون ڈاکٹر ماہ رنگ بلوچ، بنجائی کمیٹی نا باسک صبغت اللہ شاہ جی، بیبگر بلوچ، بیبو بلوچ، گلزادی بلوچ تون اوار سد آتا کچ بندغ آتے گدرینگوکا اِرا تو ئٹی جتا وخت آتیٹی دزگیر کرسہ کالونیل قانود تھری ایم پی او نا رد ئٹ ہدہ جیل و بلوچستان نا ایلو زندان آتیٹی وے قانودی بند کننگانے۔
او پارے کہ دا وے قانودی دزگیری تا برخلاف عدالت آ مون کننگا و قانودی وڑ ئٹ تینا مہبر آتا کیس آتے عدالت ئٹی درین۔ ولے عدالت گدرینگوکا ارا تو آن دا کیس آتیٹی چرجوئی ئٹ ہُرے کننگ ئٹی ءِ۔ ہندا وخت ئٹی اسہ بینچ ئس کیہی وار کیس ئے بِنگُنے و کیہی وار سرکاری وکیل ننا مہبر آتا برخلاف ہچو ثبوت مونا ہتنگ ئٹی بےسوب مسُنے۔ واہم جج آک فیصلہ ئے بنفنگ آن تینے تورینو و ہُرے کننگ ءُ۔
او گیشتر پارے کہ دوشمبے نا دے اسہ وار پین ننا مہبر آتا پیشی اسک و اسہ وار پین ہم سرکاری وکیل ہچو ثبوت یا دلیل ئس مونا ہتنگ ئٹی بے سوب مس۔ اصول آتا رد ئٹ ننا مہبر آتے اینو آب ئٹ آجو کروئی اسک۔ ولے عدالتی بینچ اسہ وار ولدا ہرے کننگ نا چم ئے کاریم ئٹ ہتِسہ تھری ایم پی او نا رد ئٹ تیبہ بلوچستان ئٹی زندان مروک کھل بندغ آتے آجو کننگ نا حکم تو تس، ولے ڈاکٹر ماہ رنگ بلوچ، صبغت اللہ شاہ جی، بیبگر بلوچ، گلزادی بلوچ، بیبو بلوچ و ماما غفار بلوچ نا کیس آتے پگہ اسکان وخت تِس و سرکاری وکیل ئے پگہ اسکان ثبوت ہتنگ نا حکم تسُنے۔ دا حد اسکان کہ دا بینچ گدرینگوکا اِرا تو ئٹی کیہی پیشی تیٹی سرکاری وکیل نا بے سوبی ئے خنانے۔
بیان ئٹی پاننگا کہ نن پُہہ مرینہ کہ دا عدالت نا تیبہ بے سوبی و عدالت و حکومت نا نیام ئٹی گٹھ جوڑ نا پیدواری ءِ، ہرا ننا مہبر آتا برخلاف ہچو ثبوت ئس وے مننگ آن پد ہم اوفتے آجو کننگ نا جہہ آ کیس ئے چرجوئی ئٹ وخت ترِسہ ہُرے کننگ نا چم آتے کاریم ئٹ ہتنگ ئٹی ءِ۔
