بلوچ یکجہتی کمیٹی نا بنجائی آرگنائزر ڈاکٹر ماہ رنگ بلوچ نا ایڑ پارے کہ 5 مارچ آ سہب ئنا 5 بجہ غا ڈاکٹر ماہ رنگ بلوچ و بیبو بلوچ ئے اسہ پُرامنو برانز ئسے آن بےقانودی دزگیر کننگا۔ اوفتِہ نوآبادیاتی دور ئنا قانود “3 ایم پی او” نا رد ئٹ ایلو سنگت آتون اوار ہدہ جیل ئٹ بندی کننگانے۔
او پارے کہ نن، یعنی خاہوت آک و بلوچ یکجہتی کمیٹی، بناء آن دا بےقانودی دزگیری تا برخلاف قانودی کسر گچین کرین و شرفدار آ عدالت آ مون کرین۔ واہم افسوس ئٹ پانہ کہ عدالت انصاف تننگ نا جاگہ غا چرجوئی ئٹ حکومتی دباؤ و سیکیورٹی ادارہ غاتا فیصلہ غا تا آہری ءِ۔
او پارے کہ 10 اپریل آ کیس بِننگ مس و دا اومیت اس کہ عدالت بندی تا زوت آجوئی نا حکم ایتو ولے حکومتی وکیل آک ڈاکٹر ماہ رنگ و اونا سنگت آتا برخلاف قانودی جواز یا ثبوت تننگ کتور، داکان بیدس ہم عدالت فیصلہ ایسر کرسا کیس ئے ہوم ڈیپارٹمنٹ نا دوٹی تس۔ ہرا تینٹ بےقانودی دزگیری تیٹ فریق ءُ۔
او ودیک پارے کہ اوکان پد ہوم ڈیپارٹمنٹ دزگیری تا وخت ئٹ اسہ تُو ئنا ودکی کرے، ہرا نا برخلاف دوارہ عدالت آ مون کننگا۔ بنداو ئٹ کیس ئے بِننگ نا وختا عدالت پھاش وڑ ئٹ حکم تس کہ ایلو پیشی ٹی حکومتی وکیل آک ثبوت تننگ کتور تو غُٹ دزگیر کننگوک بندغ آتِہ آجو کننگو۔ واہم دوارہ کیس ئے بِننگ نا وختا حکومت ہچو ثبوت یا دلیل تننگ کتو۔ ننے اومیت اس کہ عدالت تینا اصول آتا روشنائی ٹی بندی تا آجوئی نا حکم ایتو ولے کیس ئے اسہ وار پدا پنچ دے کن پد بٹنگا۔
او پارے کہ نن اندا سرپند مرینہ کہ ڈاکٹر ماہ رنگ بلوچ و بی وائی سی نا ایلو باسک آتا کیس ئے چرجوئی ئٹ پد بِٹنگ آن عدالتی شرف ئے نسخان مننگ ءِ و الس ئنا باور عدالتی نظام آن بش مننگ ءِ۔
ایسر ئٹ او پارے کہ پگہ دو شمبے نا دے ڈاکٹر ماہ رنگ بلوچ و بلوچ یکجہتی کمیٹی نا ایلو سنگت آتا کیس اسہ وار پدا عدالت ئٹ بِننگ مرو۔ نن غُٹ وکیل آتیان خواست کینہ کہ او ننا مخ تفی کن ساڑی مریر و دا قانودی جہد ئٹ ننے کمک کیر۔
