بلوچ نیشنل موومنٹ (بی این ایم) نا بندغی حق آتا ادارہ "پانک” شال بلوچستان ئٹی است ئے سرفوکا رپورٹ آتے آ خُلیس نا درشانی کرینے، اونا رد ئٹ شال ئنا اسپتال نا مڑدہ خانہ ٹی داسکا 45 آن زیات جشوک جون ہتنگانے۔ پانک ئنا رد ئٹ پک انگا حوال تروکا تا رد ئٹ دا منہ دے ئٹی پین پنچ جون ہتنگانے ہراڑان مڑدہ خانہ نا حالیت گیشتر خراب مسُنے۔ حوال تا رد ئٹ جشوک آ جون تے اسٹ ایلو نا زی آ تخنگ مننگ ئٹی ءِ، ہراڑان نہ بیرہ لس مخلوق نا جانجوڑی آ سختو خطرہ ودی مسُنے بلکن دا اسہ دڑد و ڈکھ ئیو عمل ئس ہم ارے۔
پانک ئنا پاننگ ءِ کہ گدرینگوکا اسہ تو ئٹی ا ِرا درزن آن زیات بندغ ئے پاکستانی لشکر دروغ ئنا مونتس آتیٹی کھسفینے۔ دافتے آن دوانزدہ بندغ نا چائنداری مسُنے و اوفتے اوفتا خاہوت آک گُڈی ہند ہم کرینو، ولے ایلو جونک داسکان بے پن و نشان ءُ۔ ہرافتے چائنداری و شرف آن بیدس تخنگانے۔ ہرا دا بحران نا گیشتری ئے پین ظاہر کیک۔
جشوک آ جون تا ساڑی مننگ دا ہیت ئنا کنڈ آ اشارہ کیک کہ دا بندغ آتے بھاز لٹ و کٹ کننگانے، اوفتے وے عدالت آن کھسفنگانے یا زوراکی ئٹ بیگواہ کننگانے۔ ہرا جہانی قانود آتا سخت انگا لتاڑ ء ِ۔ پانک زور شاغانے کہ دا بیرہ جانجوڑی نا جیڑہ ئس اف بلکن اسہ گندہ ؤ انسانی المیہ ئس ءِ ہراڑا زوت پام تننگ المی ءِ۔
پانک حکومت پاکستان آن بیدس ہندی و جہانی بندغی حق آتا ادارہ غاتے آن خواست کرینے کہ او زوت گامگیج ہرفِر، ہراٹی ہر اسہ جون ئنا آزات و فرانزک پٹ و پول، مننگ کروک وڑ ئٹ چائنداری مروکا تا پن تے مونا ہتنگ، جون تے اوفتا خاہوت آتا دو ٹی تننگ، ذمہ وار آتے انصاف نا عدالت ئٹی ہتنگ و جہانی مبصر آتے حالیت آتے تینٹ ہُننگ نا موکل تننگ اوار ءُ۔
تینا بیان ئٹی پانک اسہ وار پین ظاہر کرینے کہ بلوچستان نا الس ئے انصاف، و شرف و آب ئٹ رہینگنگ نا حق دوئی ارے۔ اگہ بے تواری و بے عملی نا چرجوئی برجاء مس تو دا بیوس آ قوم ئنا ٹپ آک پین بھلن مرِسہ کرور، ہرا مُست آن ریاستی لٹ و کٹ و وے کچ زوراکی نا گواچی ءِ۔
