بلوچستان نا ضلع کیچ ئنا علاقہ تمپ کلاہو ٹی نادرست آ سلاہ بند بندغ آتا سمکاری آن اسہ ورنا ئس بیران، کراچی آن پاکستانی لشکر و ڈھکوک ایجنسی تا دو آن اسہ بلوچ خوانندہ ئس بیگواہ کننگانے۔
تمپ کلاہو ٹی اینو سہب ئنا یانزدہ نیم آ نادرست آ موٹر سئینکل سوار بندغ آک، تینا اسٹور آ تولوک بندغ ئے سمکاری کرسا کھسفیر۔
بیران مروکا بندغ نا چاہنداری تمپ کلاہو نا جہی شوکت نا مار احسان نا پن ئٹ مسنے۔
جہی حوال تروکا تا پاننگ ءِ کہ احسان شوکت ہنوکاتم ئٹ پاکستانی لشکر نا دو آن بیگواہی نا گواچی ہم مسس و پدان آجو کننگاسس۔ اینو اودے سمکاری کرسا کھسفنگانے۔
ایلو کنڈ آن کراچی آن اسہ بلوچ خوانندہ ئسے زوراکی نا بیگواہی نا حوال رسینگانے۔
حوال تروکا تا رد ئٹ اوتھل یونیورسٹی آن خوانوک شاہ نواز ئے پاکستانی سیکورٹی لشکر و ڈھکوک ایجنسی تا کارندہ غاک 29 و 30 اپریل نا نیامیکو نن سہب ئنا چھار بجہ غا کراچی ٹی اونا اُراغان دزگیر کننگ آن گُڈ بیگواہ کرینو۔
شاہ نواز بلوچستان نا ضلع کیچ ئنا علاقہ بلیدہ میناز نا جہی ئس ءِ، و کراچی ٹی تینا خاہوت تون علاج کن ساڑی اس۔
اونا خاہوت اونا زوراکی نا بیگواہی آ فریشانی نا درشانی کرینے و اونا آجوئی نا خواست کرینے۔
