بلوچستان نا دریابی علاقہ پسنی آن پاکستانی لشکر و ڈھکوک ایجنسیک پنچ ورنا دزگیر کننگ آن گُڈ بیگواہ کرینو۔
حوال تا رد ئٹ 28 اپریل آ مُسہ ورنا پاکستانی لشکر اوفتا اُرا غا چھاپہ نا وختا دزگیر کننگ آن گُڈ بیگواہ کرینے، ہرافتا تعلقداری پسنی نا وارڈ نمبر 1 ببرشور آن ءِ۔
بیگواہ کننگوک ورنا تیٹ ساجد نا 22 سالی آ مار ماجد، عنایت نا 23 سالی آ مار شوہاز بلوچ و مختار بلوچ نا 17 سالی آ مار نعمان بلوچ اوار ءُ۔ پن کروک بندغ آتان ساجد و نعمان خوانندہ ءُ و شوہاز مچی ہلوک ئس ءِ۔
اندن یک مئی آن حیدر علی نا مار عدنان حیدر ہم بیگواہ ءِ ہرا پسنی نا بنگلہ بازار وارڈ نمبر 1 آن تعلقداری تخک۔
خاہوت نا پاننگ ءِ کہ دائسکان ننے اونا بارو ئٹ ہچو حوال رسیگتنے و نئے سرکاری ادارہ غاتا تا پارہ غان کس حوال تسنے۔
ایلو کنڈ آن شئے مرید حسین پنیئو ورنا ئس پاکستانی لشکر حجام نا دکان آن دزگیر کننگ آن گُڈ بیگواہ کرینے۔
پن کروک ورنا ئے پسنی وارڈ نمبر 3 باغ بازار آن تعلقداری تخک۔ خاہوت اونا زوت آجوئی نا خواست کرینے۔
