لندن: بلوچستان نا پد سلوک آتا توار ئے جہانی پڑ آ سر کننگ کن بلوچ نیشنل موومنٹ (بی این ایم) برطانیہ نا جمہوریت نا بنجاہ ٹی اسہ لابنگ نا مچی ئس اڈ تِس۔ دا مچی پارلیمنٹ نا باسک جان میکڈونل نا کمک ئٹ جوبلی روم ئٹی اڈ ہلک، ہراٹی پارٹی نا چیئرمین ڈاکٹر نسیم بلوچ نا بھلنی ٹی بی این ایم نا بھاز آ باسک آک اوار مسُر۔
مُچی نا وخت آ بی این ایم زوراکی نا بیگواہی "خلنگ و خسنگ”، وے سوب آن دزگیر کننگ، و سیاسی اختلاف رائے نا برخلاف کریک ڈاون نا وڑ انگا جیڑہ تے آ روشنائی شاغا۔ خاص وڑ ئٹ بلوچ یکجہتی کمیٹی (بی وائی سی) و ایلو سیاسی باسک آتے آ برجاء ریاست نا زوراکی ئے مونا ہتنگا۔
بلوچستان نا جیڑہ آ پام تننگ و کمک ئے دوئی کننگ نا مسخت ئٹ اڈ ہلوک دا مُچی ٹی بلوچ شہید آتا خاہوت آک و زوراکی نا بیگواہی تان زیمی مروک آک ہم اوار مسر و تینا دڑد و ڈکھ آتے درشان کریر۔ زوراکی ئٹ بیگواہی آن پد آجو مروکاک ڈھکوک آ زندان آتیٹی تینتو مروک بیدادی و ناروا آ روشت نا بارو ئٹ پاریر۔
مُچی ٹی برطانیہ نا پارلیمنٹ و اوفتا ٹولی تو بلوچستان نا سیاسی جیڑہ و اوفتا وے حل مروک حیثیت آ گپ و تران کننگا۔ کیہی پارلیمنٹ نا باسک آک مچی ٹی ساڑی مسر، ہندن بھاز آک اوڑدئی نا درشانی کننگ کن تینا نمائندہ آتے مون تسُر۔
بی این ایم نا باسک آک مچی آن مُست پارلیمنٹ نا جتا باسک آتیتو حوال کریر تانکہ سیاسی پڑ آ بھازی ئٹ اوار مننگ و کمک ئے یخینی جوڑ کننگ مرے۔
بی این ایم نا ترجمان نا رد ئٹ دا سفارتی کوشست بلوچ راجی جنز ئے جہانی پڑ آ مُستی دننگ و جہانی کہول آ بلوچستان نا بندغی حق آتا لتاڑنگ نا برخلاف کاروائی کننگ آ زور شاغنگ کن اسہ جوانو گام ئس ءِ۔
