کراچی یونیورسٹی ٹی بلوچ اسٹوڈنٹس الائنس نا بنجائی چیئرمین جاوید بلوچ نا بیگواہی نا برخلاف اسہ پر امنو برانزی ریلی ئس اڈ تننگا۔
بلوچ اسٹوڈنٹس الائنس نا رد ئٹ دا برانز جاوید بلوچ و کوئٹہ زون نا سیکرٹری جنرل گہرام اسحاق نا بیگواہی تا برخلاف اسک۔ دانا مسخت ریاستی زوراکی تا برخلاف شعور ودی کننگ و بیگواہ غا بندغ آتا زوت آجوئی نا خواست کننگ اسک۔
ہموتم خوانندہ غاک بھلو کچ ئسیٹ اوار مسر۔ برانزیک پلے کارڈ و بینر ہرفیسر و نعرہ خلکر۔ اوفتا پاننگ اسک کہ جاوید بلوچ و گہرام اسحاق نا بیگواہی سیاسی و فکری تحریک ئے توننگ نا کوشست ءِ۔
برانزی تا پاننگ اسک کہ زورانسری بیگواہیک بندغی حق آتا لتاڑ تون اوار ریاستی راہبند، قانود و ریاست نا جمہوری حیثیت آ سوج ئسے اُر۔
او پاریر کہ اسہ باشعور خوانندہ ئس زوراکی تا برخلاف مزاحمت نا چیدہ مریک و بلوچ خوانندہ غاک مدام عملی و سیاسی میدان ئٹ اہم کڑد سر ایترہ۔
ایسر ئٹ برانزیک خواست کریر کہ جاوید بلوچ و گہرام اسحاق ئے زوت پھاش کننگِہ و زورانسری بیگواہی تا لڑ ئے بند کننگِہ، ہرا کہ اشتماعی ضمیر آ اسہ گندہ ؤ داغ ئس جوڑ مسنو۔
