بلوچستان ئٹی زوراکی نا بیگواہی تا لڑ برجاء ءِ، و حوال تا رد ئٹ پین اِرا بلوچ ورنا پاکستانی لشکر دزگیر کننگ آن پد نادُرستو جاگہ ئس درینے۔
شابیتی حوال تا رد ئٹ، بلیدہ نا جہی بندغ ئس پاکستانی لشکر کراچی آن بیگواہ کرینے ہرا نا چاہنداری خدامرزی حاجی اللہ بخش نا مار شاہنواز نا پن ئٹ مسنے۔
پاننگک کہ پن کروک بندغ علاج کن تینا خاہوت تون اوار کراچی آ ہناسس ہرادے 29 و 30 اپریل نا نیامیکو نن چھار بجہ نا وخت آ نیول کالونی کراچی آن سرکاری ادارہ آتا کارندہ غاک دزگیر کننگ آن پد بیگواہ کرینو۔
خاہوت نا رد ئٹ، شاہنواز ئے وردی بینوک کارندہ غاک زور ئٹ تینتون دریر، و اوکان پد دائسکان اونا ہچ ڈس اف۔
خاہوت نا پاننگ ءِ کہ اوفک تھانہ و ایلو ادارہ آتون حال حوال کرینو ولے ہچ جاگہ آن دائسکان ورندی رسینگتنے۔
شاہنواز نا خاہوت و سیال آک حکومت، بندغی حق آتا تنظیم و ادارہ تیان خواست کرینو کہ اوفک زوت دا ویل ئٹ دو شاغِسہ شاہنواز ئے آجو کرِفر۔
اوفک پاریر کہ اگہ ورناغا دوبہ ئس ارے گُڑا اودے عدالت ئٹی ہتنگ مرے نئے کہ دن بےقانودی بیگواہ کننگِہ۔
ایلو کنڈ آن پسنی آن ہم اسہ پین ورنا ئسے زورکی ئٹ بیگواہ کننگانے۔
حوال تا رد ئٹ وارڈ نمبر 3 باغ بازار نا ہندی ورنا شئے مرید حسین ئے پسنی بازار آن اسہ حجام ئسے نا دکان آن سلاہ بند بندغ آک زور ئٹ ہرفِسہ درینو ہراکان گڈ او بیگواہ ءِ۔
یات مرے کہ تدوکا 24 ساہت ئٹی پسنی ٹی دا چھارمیکو تدینی ءِ، و بلوچستان آن زوراکی ئٹ بیگواہی نا 19 کیس رپورٹ مسُنے۔
