بلوچستان نا جتا ضلع آتیٹ مروکا سُمکاری و بیدادی نا ایلو تدینی تیٹ مُسہ بندغ ساہ تُسر و اِرٹ ٹپی مسُر۔
پنجگور نا ہند عیسئی آن اسہ بندغ ئسے نا جشوک جون خننگانے ہرانا چاہنداری پنجگور وشبود نا جہی اکرم نا مار مکرم نا پن ئٹ مسنے۔ خون ئنا سوب دائسکان چائنگ متنے۔
اندن بلوچستان نا دریابی علاقہ پسنی نا ہند کلانچ ئٹی خدا بخش نا مار زاہد پنیئو بندغ ئسے نا جون خننگانے ہرادے زوت آر ایچ سی اسپتال آ دننگ مسنے۔ خون ئنا سوب دائسکان چائنگ متنے۔
ایلو کنڈ آن خضدار نا تحصیل نال ئٹی سُمکاری نا تدینی ٹی اِرا ایلم سیف مینگل و وحید مینگل سخت ٹپی مسنو۔ ہڑتُما تِہ اسپتال آ دننگانے ہراڑے اوفتا علاج مننگ ءِ۔
نوشکی ٹی مروکا تدینی ٹی بیران مروکا تا کچ پنچ آ سر مسنے۔ ایلو بیران مروکا نا چاہنداری غریب آباد نا جہی محمد طیب نا پن ئٹ مسنے۔
یات مرے کہ منہ دے مُست نوشکی ٹی آئل ٹینکر ئسیٹی خاخر لگنگ آن شست آن گیش بندغ آک ہشنگاسر ہرافتیٹ دائسکان پنچ بندغ ساہ تسنو۔
