ضلع مستونگ نا ہند اسپلنجی و ہیب کھیب ئٹ اینو چارمیکو دے ءِ کہ لشکر کشی برجاء ءِ۔ لشکری کارندہ تا بھلو کچ ئس ہند ئٹی ساڑی ءُ، کابوئی، تلخہ کاوی و خُڑک ئنا مش و میدانی ہند آتیٹی ہیلی کاپٹر و سرویلنس ڈرون آتا ہن ئہ بر برجاء ءِ۔
ہندی حوال تروک آتا رد ئٹ اینو سہب ئنا سیکیورٹی لشکر نا قافلہ آک اسہ وار پدا اسپلنجی و خُڑک ئنا ہند آتیٹی بسنو، ناکہ بندیک سخت کننگانو و ہن ئہ بر نا کسر تے آ پٹ و پول نا عمل برجاء ءِ ۔ دا حالیت نا سوب آن لَس بندغ آتے بھاز مشکل آتے مون تروئی تمنگ ءِ۔
علاقہ ٹی وار وار گولہ باری و سُمکاری نا توار بننگ مننگ ءِ، ولہ داسکان پین جانی نسخان نا حوال رسینگتنے۔ ہندی حوال تروک تا رد ئٹ لشکری کارندہ آک کیہی اُرا تے آ چھاپہ خلکُنو و کیہی بندغ آتے دزگیر کننگ نا حوال ہم مونی بسنے۔
کابوئی و تلخہ کاوی نا مشی ہند آتیٹی ہیلی کاپٹر آتا زیات بننگ آن ہندُن گمان مریک کہ پاکستانی لشکر بھلو لشکر کشی سینا تیاری کننگ ءِ۔ ڈرون جہاز آتا ہر وخت نا پھیری نا سوب آن ہندی بندغ آک خُلیس نا گواچی ءُ۔
یاتی مرے کہ اسپلنجی ٹی برجاء دا لشکر کشی ئے چار دے مسنے، ہراٹی زمینی و فضائی طاقت نا کارمرز ہم برجاء ءِ۔ ہندا وخت شاری تا دزگیری و زوراکی ئٹ بیگواہی تا حوال مونی بسُنے۔
داسکان پاکستانی لشکر نا نیمہ غان پین پک او بیان مونا بتنے، واہم بھاز بلوچ سلاہ بند آجوئی خواہوک تنظیم آک پاکستانی لشکر آ جلہو تا زمہ واری تے ہرفینو۔
