بلوچ وومن فورم کیچ ئنا جنرل باڈی مجلس بنجائی آرگنائزر ڈاکٹر شکیل بلوچ نا بھلنی ٹی اڈ تننگا۔ مجلس ئٹ مہمان خاص بنائی سینٹرل کمیٹی نا باسک شہناز بلوچ ساڑی اسک۔
مجلس نا ایجنڈا تیٹ بنیائی سرکولر تنظیم سازی، علاقائی و جہانی سیاسی صورت حال و بروکا وخت ئنا لائحہ عمل اوار اسک۔
مجلس نا بنیاتی ٹِک آ تیا تران و نشست اڈ تننگا، و بنجائی سرکولر نا رد ئٹ خیال آتا درشانی مس۔
بنجائی زمہ وارک تران کرِسہ پاریر کہ بلوچ زالبول آتے بلوچ نیشنلزم نا بنیات آ اوار کننگِہ۔ اوفتے بلوچ وومن فورم نا پلیٹ فارم نا زریعت ئٹ منظم کننگ نا گرج ءِ تانکہ بدل مروکا حال آتا رد ئٹ ہر وڑ ئنا ظلم و زوراکی تا برخلاف مزاحمت کن تیار مننگ کیر۔
او ودیک پاریر کہ اینو نا دور ئٹ سیاسی تحریک آتیا کریک ڈاؤن کننگ مریک ولے زالبول نرینہ تون اوار تینا جاگہ جوڑ کرینو۔ و بھلا پوزیشن تیا تولِسہ تینا توار ئے بڑز کننگ ءُ۔ دہن کل برطانوی دور حکومت ئٹ ہندوستان نا تحریک آجوئی ئٹ ہم زالبُولک کڑد ادا کریسُر۔
او پاریر کہ ننا جہد ئنا دید آک متنوع ءُ و داٹی زالبول تا بھلو کچ ئس اوار ءِ۔ ہر اسہ بندغ ئے تینا توار بڑز کروئی ءِ۔ چپ تولوئی اف و تینا بصیرت و کوشست تیان تحریک ئے مونی دروئی ءِ۔ ننے بلوچستان ئٹ ہم اندا سوچ تون اوار کاریم کروئی مرو۔ انتئے کہ ننے تینا بنیاتی حق آ تیکن جہد کروئی ءِ تانکہ الس ئٹ بیداری ودی مرے۔
او پاریر کہ کیچ، ہرا غلام محمد، کمبر و کریمہ بلوچ نا وڑ عظیم راہشون تا سرزمین ءِ، ہر کرن ئٹ بلوچ راج ئے عظیم سیاسی راہشون تسنے۔ ہرافک تینا ساہ تا ٹیکی ترِسہ مزاحمت نا چیدہ جوڑ مرِسہ دیہاڑ ئٹ ساندہ کن زندہ سلیسُر۔
بنجائی زمہ وارک پارینو کہ بلوچ وومن فورم (بی ڈبلیو ایف) نا زمہ واری ءِ کہ بلوچ زالبول تا سیاسی تربیت آ کاریم کیر تانکہ اوفتیٹ راجی شعور ودی مرے و سو راجی جہد ئٹ تینا کڑد ئے سر تننگ کیر۔
بروکاتم ئنا لائحہ عمل نا رد ئٹ بلوچ وومن فورم کیچ ئنا آرگنائزر باڈی جوڑ کننگا۔ ہراٹی صابرہ بلوچ ئے آرگنائزر، حوا بلوچ ئے ڈپٹی آرگنائزر، ماہ گنج بلوچ، گلشن بلوچ و بسما بلوچ ئے آرگنائزنگ کمیٹی نا باسک گچین کننگا۔
