مستونگ نا علاقہ اسپلنجی ٹی لشکر کشی، علاقہ ٹی لشکری کارندہ غا تا گشت و مخلوق ئے زوراکی ئٹ بیگواہ کننگ نا برخلاف لس مخلوق نا اسِہ وڑ برانز برجاء ءِ۔
جہی بندغ آتا رِد ئٹ ایف سی مُسِہ دکاندار و اِرا بزغر دزگیر کرسا بیگواہ کرینے ہرافتا اِرٹ بشام نا مار یونس و شیر احمد نا مار بلال نا پِن ئٹ درست مسنو۔
برانزیک بیگواہ کننگوک بندغ آتا زوت آجوئی نا خواست کرینو۔
مخلوق نا بھلو کچ ئس ایف سی کیمپ ئنا کُنڈ آ مارچ بناء کرے۔
برانزی تا پاننگ ءِ کہ ہڑدے پاکستانی لشکر اُرا تیا چھاپہ خلیک چادر و چاردیواری نا بے شرفی ئے کیک۔
او پاریر کہ جہی بندغ آتِہ ہڑدیئی بنداو آ بے سوب تنگ کننگک، ایف سی کیمپ ئٹی زندان کرسا لٹ و کُٹ کننگک۔ ہندا سوب آن اسپلنجی نا الس برانز کننگ کِن بیوس مسنے۔ اگہ پاکستانی لشکر تینا رویہ ئے بدل کتو تو برانز ئنا کچ پین بلُن مرو۔
