بلوچ ویمن فورم شال زون ئنا آرگنائزنگ باڈی اجلاس کننگا ۔
ماروش بلوچ آ رگنائزر و نرگس سلطانہ بلوچ ڈپٹی آرگنائزر گچین کننگار ۔
بلوچ ویمن فورم شال زون ئنا آرگنائزنگ باڈی اجلاس آگنائزر ڈاکٹر شلی بلوچ نا بھلُنی ٹی مس ، اجلاس نا مہمان مرکزی ڈپٹی آرگنائزنگ کمیٹی نا باسک فرزانہ بلوچ مس ۔
مرکزی رہشون نا اجلاس ئٹی ہیت پارے کہ ریاست بلوچ راج ئے ہر وڑ ئٹ ظلم وستم نا گواچی کننگ ءِ ریاست بیدس فرق کننگ آن بلوچ نرینہ و زالبول آ تا برخلاف کاریم کننگ ءِ اینو بلوچستان نا کُنڈ کُنڈ آن بلوچ زالبول آک ریاستی ظلم ئنا برخلاف ءُ ۔
بلوچ راج ریاستی زوراکی نا برخلاف اسہ منظم طریقہ سیٹ جدوجہد کننگ ءُ ہراٹی بلوچ زالبول آک فرنٹ لائن آٹو۔ بلوچ زالبول آ تا دا عمل راجی بقاء کن اسہ چیدہ ئس مرو ۔
مرکزی رہشون آک اجلاس تون کرسا پاریر کہ بلوچ ویمن فارم دا پوہ مریک کہ بلوچ زالبول آک بلوچ نیشنلزم نا سیخا آ منظم مرسا اسہ پلیٹ فارم ئسینا سوب آن بلوچ سیاست ئٹی اہم ءُ کردار ادا کننگ ءُ۔ بلوچ نیشنلزم آن نن بلوچ راجی بقاء کن جدوجہد کننگ کینہ و دا وخت ئنا اہم ءُ بکار ئسے کہ بلوچ زالبول بلوچ نیشنلزم ئے ہرفسا نیشنلزم سیاست نا زریعہ ئٹ تینا حق و سرزمین نا رکھ ئے کیر ۔
مرکزی رہنما آک ہیت کرسا پاریر کہ دا وخت بلوچستان ئٹی بندغی حق آتیکن خرابءُ حالیت ئسے و انسانی حق آ تا لتاڑینگ تینا بُڑزی ٹیءُ ورنا تے بیگواہ کننگ ئٹی تیزی ہتنگانے و بیگواہ بندغ آ تا کچ ودینگ ءِ ہرافتا ننے خُلیس ءِ کہ لشکری کارندہ آتا نیمہ آن ہڑدے نا بنیاد آ اُرا تہ چھاپہ ،سامان تہ لوٹ و پُل ، چُنا و زالبول آ تے تنگ کننگ، بندغی حق و جہانی قانون آتا خلاف ورزی ئے ہرادے زوت بند کننگ مرے ۔
مرکزی رہشون آک پین ہیت کرسا پاریر کہ بلوچ مارچ ئٹی بلوچ زالبول آتا بھازی دا ہیت ئنا ثبوت ئے تننگ ءِ کہ بلوچ زالبول آک بلوچ نیشنلزم نا بنیاد آ تینا راجی فرض ئے پورو کننگ کن قُربانی آن پد مفرور، راجی جدوجہد ئٹی اہم ءُ کردار ادا کننگ کن ہروخت تیار ءُ و بلوچ ویمن فورم بلوچ زالبول آ تے نیشنلزم نا بنیاد آ اسہ پلیٹ فارم ئسے آ منظم کننگ کن جدوجہد کننگءُ ۔
بلوچ ویمن فورم نا اجلاس ئٹی پین ایجنڈا آ ک زیر بحث مسُر او ایسر آ مونی لائحہ عمل نا ایجنڈا تون اوار شال زونل آرگنائزنگ باڈی اڈ کریر ہراٹی آرگنائزر ماروش بلوچ ڈپٹی آرگنائزر نرگس سلطانہ بلوچ ، شربانو بلوچ ، شاری بلوچ ، سُمعیہ بلوچ آرگنائزنگ کمیٹی نا باسک جوڑ مسُر ۔
