بلوچ یکجہتی کمیٹی نا ترجمان تینا بیان ئٹ پارے کہ تنظیم نا راہشون ڈاکٹر ماہرنگ، بنجائی سروک شاہ جی صبغت اللہ، بیبگر بلوچ، بیبو بلوچ و گلزادی بلوچ نا جیل ئٹ بین برانز ئے چھار دے پورو مسنے۔ دا بین برانز نا سوب آن اوفتا تب ترندی ئٹ خراب مننگ ءِ۔
او پارے کہ بیبو بلوچ ئے ہدہ جیل کوئٹہ آن پشین جیل آ دننگ و سی ٹی ڈی و پولیس کارندہ تا جیل ئنا تہٹی پیہِسہ ڈاکٹر ماہرنگ، بیبو و گلزادی بلوچ آ بیدادی تا برخلاف ڈاکٹر ماہرنگ، بیبو، گلزادی شاہ جی و بیبگر بلوچ بین برانز بناء کرینو۔
بیان ئٹ پاننگا کہ اینو ہمر ریاست پاکستان ننا راہشون تون جیل ئٹ ظلم و زوراکی نا گندہ ءُ مثل جوڑ کننگ ءِ، نن بحیثیت راج دا زوراکی نا کسہ غا تے تینا یاداشت ئٹ نوشت کننگ اُن۔ نن نہ دا زوراکی تے درگزر کرون و نہ ریاست پاکستان ئے بشخون۔ اینو ریاست تاغت نا نشہ ٹی بدمست ہُلی نا وڑ جیل ئٹ بلوچ زالبول تے بیدادی نا گواچی کننگ ءِ۔ و اوفتے چرجوئ ئٹ بیم ئنا گواچی کننگ ءِ، ولے دا تاغت ساندہ کن برجاء مفرو۔ دہنا فاشسٹ و جابر ریاست آتا مثیل جہاں نا دیہاڑ ئٹ پھاش ءِ۔ نن اینو دا ریاست ئے ساف پانہ کہ بلوچ راجی راہشون تیا جیل ئٹ مروکا بدسلوکی تا بدلہ بلوچ راج تینا اشتماعی تاغت و السی قوت ئٹ ہلو۔ بلوچ راج دا زوراکی و بربریت ئے ہچ دروشم ئٹ درگزر کروف۔
او پارے کہ نن بلوچ راج ئنا کل سیاسی و چاگڑدی ٹولی و تنظیم آ تیان خواست کینہ کہ دا زوراکی نا برخلاف عملی وڑ ئٹ بلوچ یکجہتی کمیٹی تون اوار سلر۔
