ڈیرہ مراد جمالی، چاغی و کیچ آن پاکستانی لشکر و سلاہ بند بندغ آتا دو آن ہندو تاجر تون اوار مُسہ بندغ زوراکی ئٹ بیگواہ کننگار و تربت آن اسہ خوانندہ ئس آجو مرسا تینا اُراغا سر مس۔ اندن کیچ آن اِرا چُنک سن مار تون اوار مُسہ پین بندغ بیگواہ۔
شابیتی حوال تا رد ئٹ ڈیرہ مراد جمالی آن پنی آ تاجر سیتل داس ئے ناُدرست آ سلاہ بند بندغ آک برمتہ کریر۔ خاہوت پک کرے کہ برمتہ کروکاک اودے نا دُرستو جاگہ ئس درینو۔
ایلو کنڈ آن ضلع چاغی نا ہند براپچہ آن 25 اپریل آ پاکستانی لشکر حاجی مصطفی نا مار ظاہر بلوچ پنیئو تاجر ئس زوراکی ئٹ بیگواہ کرینے۔ بی وائی سی اونا بیگواہی نا حوال ئے پک کرے کہ ایف سی اودے دزگیر کرسا زوراکی ئٹ بیگواہ کرینے۔
اندُن ضلع کیچ ئنا ہند تمپ نالیچہ آن پاکستانی لشکر 23 اپریل آ شوکت ولد ایوب پنیئو ورناس ئسے دزگیری آن پد زوراکی ئٹ بیگواہ کرے۔
ایلو کنڈ آن ضلع کیچ ئنا ہند چاہین کور تربت یونیورسٹی نا خُڑک 06 مارچ آ لشکری کارندہ غاتا دو آن بیگواہ کننگوک قریش نعیم آجو مرسا تینا اُراغا سر مسنے۔ خاہوت اونا آجوئی نا حوال ئے پک کرینے۔
اندن ضلع کیچ ئنا علاقہ تمپ بوستان آن 25 اپریل 2025 آ نن ئنا سئے بجہ غا پاکستانی لشکر چھاپہ خلِسہ اِرا چُنک سن مار زوراکی ئٹ بیگواہ کرینے۔
بیگواہ کننگوک چُناک غفار نا مار شمیم ہرا نا سن 10 سال ءِ، و رسول بخش نا مار عارف ہرا نا سن 15 سال ءِ، نا پن تیٹ درست مسنو۔
جہی بندغ آک حوال تسنو کہ چھاپہ نا وختا پاکستانی لشکر خاہوت آ بیدادی کرسا دڑوک ہم تس و چُنا تِہ ہرفِسہ تینتو درے۔
خاہوت نا پاننگ ءِ کہ اوفتِہ سختی ئٹ چُپ مننگ نا دڑکو تننگا و پاننگا کہ او کس ئتون حال حوال کپس۔ خاہوت خواست کرے کہ ننا چُنا تِہ زوت آجو کننگِہ۔
اندا وڑ تمپ ئنا علاقہ تگران آباد آن ہم پاکستانی لشکر اسہ اُرا ئسے آ چھاپہ خلِسہ اللہ داد نا مار مجاہد پنیئو ورنا ئسے دزگیر کرسا بیگواہ کرینے۔
