ایران نا دریابی شار بندر عباس نا شاہد رجانی بندرگاہ آ اسہ تُرندو تراک ئس مس، خاخر لگّنگ آن 516 بندغ ٹپی مننگ نا حوال ءِ۔
تراک ہفتہ نا دے نیمروچ نا وخت آ بندرگاہ نا سینا کنٹینر یارڈ آ مس ہراڈان کیہی کنٹینر تیٹی خطرناکو مواد یا کیمیکل مسس۔ تراک آن پد اسہ بھلو خاخر ئس بش مس و مونا موڷ تا جمر ئس کیہی کلومیٹر مُر ئسکان خننگا۔
تراک ئنا تُرندی آن خُڑک ئنا ماڑی تا شیشہ غاک پِنار و اسہ ماڑی ئس بُھس مس۔
بنداوی حوال تیٹ 281 بندغ ٹپی مسنے اوکان پد دا کچ 406 و پدا 516 مس۔
دمدستی سروس، ہرمزگان ریڈ کریسنٹ سوسائٹی تون اوار زوت تراک ئنا جاگہ غا سر مرسہ ٹپی تے خُڑک ئنا اسپتال آ دریر و خاخر نا کھسفنگ نا کوشست کریر۔
بنداوی پٹ ئہ پول ئٹی غفلت و خاخر ہلوک مواد نا وے مننگ خننگار۔ قومی ایرانی پٹرولیم ریفائننگ و ڈسٹری بیوشن کمپنی پھاش کرے کہ تراک آن ریفائنری ایندھن نا ٹینک آتا ونڈ کننگ نا بنجاہ یا تیل آتا پائپ لائن تے ہچ نسخان رسینگتنے۔
شاہد رجانی بندرگاہ ایران نا اسہ بھلو تجارتی بندرگاہ ئس ءِ او سال ئٹی تقریباََ 80 ملیون ٹن سامان دانگ اینگ رادہ کیک۔ دا تدینی نہ بیرہ جہی تیبر آ بلکہ جہانی تیبر آ اسہ ڈُکی ئس جوڑ کننگ ءِ۔
