بیبو بلوچ، ڈاکٹر ماہ رنگ، گلزادی و ایلو سروک آتیا جیل ئنا تہٹی سی ٹی ڈی نا کارندہ غا تا بیدادی و ایلو باسک آتا دزگیری تا برخلاف جمعہ نا دے تیبہ بلوچستان ئٹ برانز اڈ تننگا۔
بلوچ یکجہتی کمیٹی نا کال آ جمعہ نا دے بلوچستان نا جتا علاقہ آتیٹ برابز اڈ تننگا، برانز تیٹ الس ئنا بھلو کچ ئس اوار مس۔
برانزیک بی وائی سی نا سروک آتا دزگیری و زوراکی نا بیگواہی تا برخلاف نعرہ خلکر۔ او دزگیر کننگوک سروک آتیا ریاستی بیدادی نا ایسری و دمدستی اوفتا آجوئی نا خواست کریر۔
برانزیک ڈاکٹر ماہ رنگ بلوچ، بیبو بلوچ و گلزادی بلوچ آ جیل ئنا تہٹی سی ٹی ڈی و پولیس کارندہ غا تا بیدادی نا مذمت کریر۔
بلوچ یکجہتی کمیٹی نا پڑو آ شام، کراچی، خضدار، مستونگ، پنجگور، تربت، کیچ، ماشکیل، خاران، چارسر، دالبندین، چاغی و نوشکی ٹی ہم برانز اڈ تننگا۔
