اسلام آباد برانز نا مسٹمیکو دور ئٹی ہنوکا دے بلوچستان نا ہند نصیر آباد وکراچی ٹی بلوچ آتا ہند لیاری ٹی برانز ریلی ئس کشنگا ۔
اسلام آباد ئٹی بلوچ نسل کشی نا برخلاف و بیگواہ بندغ آ تا آجوئی کن برجاء اِنگا برانز ئنا مسٹمیکو دور ئٹی بلوچ برانزی تون اواری کن بلوچستان تون اوار کراچی ٹی بلوچ یکجہتی کمیٹی نا بھلُنی ٹی برانز و ریلی کننگا ۔
برانز ریلی تیٹی زالبول و چُنا ،سیاسی باسک آ تیتون اوار خوانندہ آتا بھلو کچ ئس اوار مس ۔ برانزیک بلوچ نسل کشی نا برخلاف نعرہ بازی کرسا خواست کریر کہ اسلام آباد ئٹی برجاء اِنگا بلوچ خاوت آت لانگ مارچ برانز نا برانزی تہ خواست آتے منر ۔
جمعہ نا دے بلوچستان نا ضلع نصیر آباد ، ڈیرہ مراد جمالی ئٹی شہریک بھازی ئٹ اسلام آباد برانز نا مُختفی ٹی اُرا تیان پیشتمار و بیگواہ مروکا تہ خاوت آ تیتون اواری کن برانزی ریلی نا بشخ مسُر ۔
نصیر آباد برانزیک اسلام آباد ئٹی برجاء اِنگا برانزئے ریاستی ادارہ آ تا نیمہ آن نزور کننگ و سخت حالیت آ تیٹی خاوت آتے تنگ کننگ ئٹ برانز ئنا توننگ ئے شیف خلکُر و حکومت آن خواست کریر کہ او بلوچ برانز ئٹی اوار بیگواہ مروکا تہ خاوت تا احترام کرسا اوفتا دردئے پوہ مریر و اوفتا بندغ آتے آجو کریفِر ۔
اسلام آباد برانزی تون اواری کن کراچی نا بلوچ آتا ہند لیاری ٹی ہم اوار بھلو کچ ئسیٹی بندغ آک کسر تہ پیشتمار ، ہندا وخت برانزی تے توننگ کن سندھ پولیس نا بھلو کچ ئس ساڈی اسک ہرافک برانزی تہ ریلی ئے توننگ کن برانزی تہ اسپیکر و ایلو گڑا تے تینتون دریر ۔
