بلوچ یکجہتی کمیٹی نا بنجائی سروک ڈاکٹر صبیحہ بلوچ نا پاننگ ءِ کہ کوئٹہ ہدہ جیل سپرنٹنڈنٹ منّانے کہ بیبو بلوچ ئے نن ئنا تہاری ٹی پشین جیل آ رادہ کننگانے۔ واہم دا کاریم نہ اونا خاہوت و نئے اونا وکیل نا رضامندی ئٹ مسُنے نئے کہ اوفتے دا نا حوال تننگانے۔
او پارے کہ پشین جیل آن دوئی مروک حوال تا رد ئٹ بیبو بلوچ دائسکان اوڑے سر متنے ہرا دا ہیت ئے پھاش کیک کہ اودے زوراکی ئٹ بیگواہ کننگانے۔
او ودیک پارے کہ داکان بیدس ڈاکٹر ماہرنگ نا خاہوت و قانودی نمائندہ آتے ہم سنگت آتون اوڑدئی نا موکل تننگ متنے ہرا فریشانی نا ہیت ئس ءِ۔
خیال ئٹ مرے اینو کوئٹہ نا ہدہ جیل ئنا تہٹی ڈاکٹر ماہ رنگ بلوچ، گل زادی بلوچ و بیبو بلوچ آ سی ٹی ڈی نا کارندہ غاک بیدادی کرسا بیبو بلوچ ئے جیل آن ہرفِسہ تینتو دریر ہراکان گُڈ اونا ہچ حوال اف۔
