بلوچ نیشنل موومنٹ (بی این ایم) نا کُنڈ آن اسہ ملٹی نیشنل (Multinational) کانفرنس ئس اڈ تننگا ہراٹی بلوچستان، سندھ، خیبر پختونخوا، کشمیر و گلگت بلتستان نا ہندی قوم دوست جماعت آتا مُہبر و بھلاک اوار مسُر۔ دا کانفرنس نا بنیاتی مسخت پاکستانی ریاست نا کنڈ آن دا علاقہ آتیٹی برجاء استعماری پالیسی، قدرتی مڈی تا لُٹ ئہ پُل، زوراکی ئٹ کوزہ و بندغی حق آتا لتاڑ تا برخلاف اواری ئٹ سیاسی و سفارتی حکمت عملی جوڑ کننگ اسک۔
مُچی آن تران کروکا تیٹی بی این ایم نا جونیئر جوائنٹ سیکریٹری حسن دوست بلوچ، ورلڈ سندھی کانگریس نا مہبر ڈاکٹر لکھو لوہانہ، جموں کشمیر پیپلز نیشنل پارٹی نا حبیب الرحمن، پشتون تحفظ موومنٹ (پی ٹی ایم ) نا فضل الرحمن آفریدی، عوامی ورکرز پارٹی گلگت بلتستان نا شیرباز و جیئے سندھ فریڈم فریڈم موومنٹ نا سہیل ابڑو اوار اسُر۔ تران کروکاک ریاست نا زوراکی، زوراکی ئٹ بیگواہی، معاشی لُٹ ئہ پُل و دود آتے آ جلہو آ شابیتی ئٹ گپ کریر و پد بِٹنگوک آ قوم آتا نیام ئٹی اواری و جہد کننگ آ زور شاغار۔
کانفرنس نا موڈریٹر بی این ایم نا مرکزی کمیٹی نا باسک حاتم بلوچ اسک۔ ہندن بی این ایم نا سیکریٹری اطلاعات قاضی داد محمد ریحان قرار داد ئے پارے۔
تران کروکاک تینا تران آتیٹی پاریر کہ پاکستان داسہ امریکہ و چین ئنا نیام ئٹی اسہ "اسٹریٹجک سینڈوچ ” ئسے نا دروشم ئے ہلکُنے۔ امریکہ و چین تومکا تا نظر دا علاقہ نا قدرتی مڈی تے آٹے۔ و دا حالیت پد سلوک آ قوم آتیکن گیشتر مشکل ودی کننگ نا سوب مرو۔ تران کروکا خبڑدار کریر کہ دا مڈی تا لٹ ئہ پل نا فائدہ بیرہ ریاستی اشرافیہ، گیشتر فوجی ادارہ آتے مرو۔ ہندن پد سلوک آ قوم آک ہنداڑِسکان کہ پنجاب نا بندغ آک ہم محروم مرور۔ ہندا بارو ئٹ تران کروکاک پاریر کہ قوم آتے گیشتر یکجاء، باشعور و سفارتی وڑ ئٹ کاریم کروئی مرو۔
او پاریر کہ سندھ اسہ آسودہ ولہ غلامو وطن ئس ءِ۔ داڑے 63درود قدرتی گیس، ہزار ٹن آتا کچ پوغ و ہڑدے ہزار آ لیٹر آتا کچ خام تیل پیشتمک۔ ولہ بدلہ ٹی بیرہ سندھ ئے لاش، زوراکی ئٹ بیگواہی و زوراکی ئٹ مذہب نا بدل کننگ دو بسنو۔ سندھ ئنا بھلاک سندھ ئنا خودمختاری، پنڈی نا کوزہ آن آجوئی و ثفافتی و مذہبی زوراکی نا ایسری نا خواست کریر۔
تران کروکاک پاریر کہ بلوچستان نا بندرگاہ، مڈی و ڈغار آتے پیشن نا کمپنی تے تننگانے، و بلوچ الس ئے ریاستی زوراکی نا ذریعت ئٹ بے توار کننگ مننگ ئٹی ءِ۔ او پاریر کہ ریکوڈک، سیندک و گوادر نا وڑ انگا منصوبہ غاک ہندی بندغ آتا منشاء آن بیدس چَٹی کننگان، ہرا نہ بیرہ معیشت ئے بھس کننگ ئٹی ءُ بلکن بلوچ نا ثقافت و چائند ئے خطرہ ٹی شاغنگ ئٹی ءُ۔
او پاکستان نا ریاست آ تنقید کرِسہ پاریر کہ ریاست نا استعماری وڑ ئٹ حکمرانی مونا بننگ ئٹی ءِ ہراڑے بندغی حق آتا لتاڑ، سیاسی توار آتے گُٹو کننگ و مڈی تا لُٹنگ ہڑدے نا کاریم ئس جوڑ مسُنے۔ او جہانی کہول آن خواست کریر کہ او دا زوراکی آ بے توار مفس انتئے کہ بے تواری تینٹ زوارکی نا کمک کننگ نا بریبر ءِ۔
کانفرنس نا ایسر ئٹ اواری ئٹ اسہ قرار داد ئس مونا ہتنگا ہراٹی سندھ ئنا دریا غان شش بھلو جو جوڑ کننگ، کشمیر ئٹی مسکوہی فوجی تے ہتِسہ پولیس یونٹ نا جوڑ کننگ و بلوچستان ئٹی سی پیک، ریکوڈک و سیندک نا وڑ انگا منصوبہ تے الس ئنا مفاد نا برخلافی پارِسہ اوفتے آن اواری ئٹ نمن کننگا۔ قرار داد ئٹی پاننگا کہ دا بیرہ اسہ دستاویز ئس اف بلکن مزاحمت نا اسہ پڑو ئس ءِ۔ و ہندانا رد ئٹ تیبہ منصوبہ تا برخلاف ہر پڑ آ توار ہرفنگ مرو۔
کانفرنس ئٹی گلگت بلتستان و کشمیر ئٹی ریاست نا لُٹ ئہ پل آ ہیت کننگا و پاننگا کہ پد سلوک آ قوم آتے آ دا علاقہ ئٹی اسہ وڑ زوراکی مننگ ئٹی ءِ۔
گیشتر پاننگا کہ جہانی ریاست آک، ادارہ غاک و کمپنیک دا لٹ ئہ پُل نا استحصالی منصوبہ تیٹی اوار مرِسہ پد سلوک آ قوم آتا برخلاف ڈوہ تا بشخ مفس۔ اگہ دہُن مس تو اوفتے دا قوم آتا مزاحمت تون مون تروئی تمو۔ کانفرنس ئٹی ساڑی کھل مہبر آک پیمان کریر کہ او بروکا وخت ئٹی تینا مزاحمت ئے سوگو کرور تانکہ پد سلوک آ قوم آتے اوفتا حق، آجوئی و خودمختاری دوارہ دو برے۔
