بلوچ خوانندہ تنظیم بلوچ اسٹوڈنٹس فرنٹ نا بنجائی چیئرمین جاوید بلوچ ئے اِستو دزگیر کننگ آن گُڈ زوراکی ئٹ بیگواہ کننگانے۔
بلوچ اسٹوڈنٹس فرنٹ نا بنجائی ترجمان تینا شنگ کروک بیان ئٹی پارینے کی استو ننکان 3 بجہ آ کراچی نا علاقہ گلستان جوہر ئٹی ساڑی بلیز ٹاور آن ریاستی ادارہ آک تینظیم نا بنجائی چیئرمین جاوید بلوچ ئے وے قانودی دزگیر کرِسہ بیگواہی نا گواچی کریر۔ اسہ پر امن تنظیم ئسے نا مُہبر نا زوراکی ئٹ بیگواہی شیف خلنگوکو کاریم ئس ءِ بلکن نن دا ادارہ تے آن اونا زوت و رکھوک آجوئی نا خواست کینہ۔
او پارے کہ چئیرمین جاوید بلوچ اسہ پر امن، سوھو و باکڑدارو خوانندہ مہبر ئس ءِ ہرا مدام ورنا تا خواننگ، خوانندہ آتا آئینی و جمہوری حق آتے دوئی کننگ کن جہد کرینے۔ اسہ ہر امنو مہبر ئسے نا وے عدالت آن دزگیری، لٹ ئہ کُٹ و زوراکی ئٹ بیگواہی نہ بیرہ آئین و قانود نا لتاڑ ءِ بلکن خوانندہ تا سیاسی شعور و فکری آزاتی آ جلہو ءِ۔
ترجمان ودیک پارے کہ ڈیہہ ئنا آئین ئٹی ہر شاری ئے درشان کننگ نا آزاتی، امن ئٹ تنظیم جوڑ کننگ و سیاسی و جمہوری کاریم تا موکل ایتک، ولے ریاستی ادارہ آک دا آئینی حق آتے لتاڑِسہ پر امن آ خوانندہ آتے ٹک کننگ ئٹی ءُ۔ جاوید بلوچ نا زوراکی ئٹ بیگواہی خواننگ نا حلقہ آتیٹی خُلیس نا حالیت ئس ودی کرینے ہراڑان خوانندہ آک ذہنی فریشانی نا گواچی مرِسہ تینے وے رکھوک تکِّرہ۔
او پارے کہ پر امن آ خوانندہ ئے بیدس ڈوہ آن بیگواہ کرِسہ لٹ ئہ کُٹ کننگ دا سوچ ئے درشان کننگ ئٹی ءِ کہ دا ڈیہہ ئٹی تینا جائز آ حق آتے ہلنگ کن سیاست کننگ اسہ ڈوہ ئس جوڑ مسنے۔
ترجمان بیان نا ایسر ئٹ حکومت، ریاستی ادارہ، عدالت و بندغی حق آتا ادارہ آتیان چیئرمین جاوید بلوچ نا رکھوک آجوئی نا خواست کرسہ پارے کہ خوانندہ آتا زوراکی ئٹ بیگواہی نا دا لڑ ئے بند کننگ مرے۔ اگہ تنظیم نا چیئرمین ئے زوت آجو کنگتو تو بلوچ اسٹوڈنٹس فرنٹ تینا آئینی و جمہوری حق ئنا رد ئٹ تیبہ ڈیہہ ئٹی برانز و سخت مزاحمت نا کسر ئے دوئی کرو۔
