پاکستانی رینجرز( سندھ) و سی ٹی ڈی 11 اپریل 2025 آ لیاری نا ہند کلری آن دزگیر کروک اختر نا دزگیری ئے پاش کرسا پاریر کہ او بلوچستان لبریشن فرنٹ ( بی ایل ایف) نا بندغ ئس ءِ و چائنیز شاری، صحافی و حساس جہہ تا جلہو تیٹی اوار اسک۔
رینجرز نا رد ئٹ، اختر 2019 ٹی بی ایل ایف ٹی اوار مسس، تینا سنگت آتون، ریکی، ویڈیو و جلہو تا ڈٹ بندی کریکہ۔
ترجمان نا پاننگ اس کہ ملزم آن سلاہ دو تمانے، پٹ و پول نا وخت او دا تدینی تیٹی اوار مننگ نا ہیت ئے منانے، واہم دا اعتراف اَرا حالیت ئٹ مسونے دانا وضاحت تننگ متنے۔
چاگڑدی باسک و بندغی حق آتا ادارہ آک اونا دزگیری ئے اسہ پین زوراکی ئٹ بیگواہی ئس پاننگ ءُ۔ اوفتا رد ئٹ اختر بلوچ ئے 11 اپریل آ سادہ پُچ آتیٹی کارندہ آک دزگیر کریر و دہ دے آن پد اودے میڈیا نا مونا دہشتگرد پاننگ ءُ۔ دا اولی تدینی افک دُنو کیہی مثال آک اریر ہراڑے بندغ آتے بیگواہ کننگانے، و پدا بھلو دوبہ تون پیش کننگ مسُنو۔
دا تدینی آ السی تپہ آتا پاننگ ءِ کہ دا وڑ ئنا عمل دا تنیا قانونی شفافیت ئے لُرد کیک بلکہ قانون نافذ کروکا ادارہ آتا بروسہ ئے ہم ایسر کیک ۔ انصاف نا تقاضہ آک ہمو وخت آ پورو مننگ کیرہ وختس ہر شہری ئے قانونی عمل، وکیل نا آسراتی و شفاف سماعت نا حق مرے۔
اوفتا رد ئٹ زوراکی ئٹ بیگواہی تیان پد دوبہ خلنگ، اخس بھلن مریر تینا تہٹی راست و مفاد نا نیام ئنا فرق ئے ڈکھیرہ۔
