ہدہ جیل آن ڈاکٹر ماہ رنگ بلوچ راج و بی وائی سی نا باسک آتیکن راہی کروکا تینا کلہو ئٹ پارینے کہ نن کن اینو دا سوج بھاز اہم ءِ کہ ننے انت کروئی ءِ۔ اینو ہراتم دا چھٹی ئے ای تہار آ کوٹی آن لکھنگ اُٹ، دا تَم آ ننا تنظیم و تحریک ریاست نا زوراکی تتون مون تننگ ءِ۔ ننا کیہئ سنگت آک جیل آتیٹ بند ءُ، و جیل آن پیشن ننا تنظیم نا مونا بند تفنگانے۔ کن کہ اہم سوج یا اہم ویل دا اف کہ ننے آ بیدادی مننگ ءِ، ننے دزگیر کننگ مننگ ءِ یا نن جیل آتیٹ بندی اُن، بلکہ کنا رہا اہم سوج دادے کہ ننے بحیثیتِ تنظیم دا حالیت آتیٹ انت کروئی ءِ؟ ای اندا سرپند مریوہ کہ اگہ نن دا سوج آ غور و فکر کننگ آن بیدس مُستی ہِننگ نا کوشست کرین تو نن بحیثیتِ تنظیم مونا ہِننگ کروفن۔
او پارے کہ ہراتم ای دزگیر مسوٹ، کنا سنگت آک دزگیر مسُر تنظیم آ کریک ڈاؤن (ایہُن دلچسپ ہیت دادے کہ نن دا لوز “کریک ڈاؤن” ئے رد کاریم ئٹ ہتینہ، نن کریک ڈاؤن آخہ بلکہ کالونیل زوراکی تون مون تننگ اُن) بناء کننگا، تو دا حالیت نا اندازہ ننے و ننا تنظیم ئے مُست آن اس، ولے واہم ننے دا حالیت ئے کُڑمبی ئٹ سرپند نا گرج ءِ۔
تینا کلہو ئٹ ڈاکٹر ماہ رنگ بلوچ پارے کہ کن کہ بیدادی، دزگیری، جیل یا دافتا ردِعمل ئٹ بھلو کچ ئسیٹ برانز کپننگ بےسوبی نا پیدواری اف، و ای اسُل دا ہیت آ زرس ہم باور کپرہ۔کن کہ بےسوبی سیاسی و فکری پدماندگی ءِ۔ ہراتم نن سیاسی و فکری وڑ آ پدماندہ مرین یا تہہ آن ہورک مرین تو او دے ننا بےسوبی نا دے مرو۔ دا حالیت آتیٹ ننا ایلو اہم ذمہ واری تیان اسٹ دادے کہ نن بحیثیتِ سیاسی کاریم کروک تینے سیاسی و فکری پدماندگی آن امر رکھین۔ فکری پدماندگی آن تینے رکھینگ نا کُل آن گچین آ ذریعت “تنظیم” ءِ۔ ولے بیرہ تنظیم نا مننگ تینٹ کافی اف بلکہ تنظیم ئٹ مرکزیت نا دامون ہیمون اسہ شون ہلوک سیاسی شعور ئسے نا ساڑی مننگ ہم المی ءِ، ہرا اسہ جال ئسے نا وڑ یونٹ آن ہلیس مرکز اسکان غُٹ باسک و شیفکو ادارہ آتے شون ہلوک سیاسی شعور ایتِہ۔
او ودیک پارے کہ اگہ نن تنظیمی و تحریکی شونداری خواہنہ، و تینے سیاسی پدماندگی آن رکھینگ خواہنہ تو دا وختا ننے اندا کاریم تیا پام تروئی ءِ۔ دا ٹِک آن نمن ہچ وڑ آ منکن اف کہ دا وختا ننتو نہ بیرہ سیاسی شعور تخوک تنظیم ئس ارے بلکہ ساڑی آ وخت ئٹ او منظم ہم ارے۔ ولے تینا ساڑی آ حیثیت آ تیوہ اُست جم مننگ یا خوش فہمی نا گواچی مننگ، تینے جمود (اسہ جہہ آ سلینگ) نا گواچی کننگ نا بریبر ءِ۔ ننے ہچ وڑ آ دیمروری و مونی ہننگ نا سفر آن تینے توروئی اف، و داڑکن ننے چرجوئی ئٹ خواری کشوئی ءِ،غور و فکر کروئی ءِ، و جستجو کونو تخلیقی ماحول ئس ودی کروئی ءِ۔
او پارے کہ ننے دا سرپند مروئی ءِ کہ بی وائی سی کون آ تنظیم اسہ حادثہ یا اسہ خاص تدینی ئسے نا ودی کروک اف، بلکہ دا چروئی ئٹ مروک جہد، غور و فکر، و جستجو نا ودی کروک ءِ، و دا نا سرسوبی کن ہم اسہ وڑ جہد، غور و فکر، و جستجو بکار ءِ۔
او پارے کہ نن کن ساندہ تنظیم کُل آن بُڑز و اہم مسنے، و دادے ساندہ اہم و کُل آن بُڑز مروئی ءِ، انتئے کہ نن ہرا زوراکی نا نظام نا برخلاف جہد کننگ اُن، اودے ننا اسہ منظم تنظیم ئسے آن بیدس باء ترفنگ منکن اف۔ اندا سوب آن دا وخت آ نن اندا منظم تنظیم آ پام ایتن۔ ننے اسہ پاس ئس ہم تینا جوزہ غاتے عٹکل آ زور تمنگ کن الوئی اف۔ ننے دننگا ہر ٹک آن مُر مروئی ءِ ہرا ننا تنظیم نا اشتماعی تاغت ئے نزور کے۔ ننے گندہ غان گندہ غا حالیت آتیٹ ہم منتشر مروئی اف۔ منظم مننگ ننا بیوسی اف بلکہ ننا تاغت ءِ۔ ننے ہر وڑ ئنا حالیت آتیٹ منظم مروئی ءِ۔ ننا ہر اسہ باسک ئے تینا نفسیات و عٹکل آ تیوہ اختیار مرے و ہچو دباؤ ئسے نا دروشم ئٹ دننگا کاریم تیان تینے رکھوئی ءِ ہراڑان تنظیم و اشتماعی مسخت زیمی مرے۔ چُنک آن چُنکا فیصلہ نا ہلنگ کن ہم ننے ساڑی آ حالیت آتا سماء مرے۔ ننے سوشل میڈیا نا کج بحثی آن زیمی مرسا ہچ وڑ آ ہم تنظیمی فیصلہ ہلوئی اف۔
او ایسر ئٹ پارے کہ سرسوبی ہر حال ئٹ ننا ءِ، بس ہمت، جیرت غور و فکر ئٹ دا جہد ئے مونا دروئی ءِ۔
