ماہ رنگ بلوچ پارے کہ حکومت ننے خاموش کننگ کتو گڑا اسہ زالبول باسک ئسینا عکس ئے ایڈٹ کرسا پروپیگنڈہ کننگءِ۔
بلوچ خاوت آتا برانز ئنا بھلُنی کروکا ماہ رنگ تینا چاگڑدی میڈیا اکاونٹ آ نوشتہ کرے کہ مظبوط و بہادر سلے کنا سنگت سمی دین، ریاست و اونا کٹھ پتلی تے اسہ زالبول باسک ئسینا عکس ئے ایڈٹ کننگ و اونا برخلاف پروپیگنڈہ کننگ آ شرم برءِ۔ ریاست ننا زالبول باسک آتے تشدد، دزگیری و تڑی تننگ ئٹ خاموش کننگ کتو داسا زالبول آتا عکس آتے ایڈٹ کرسا پروپیگنڈہ نا سہارہ ئے ہلنگءِ ولے دا پروپیگنڈہ داسا چلیپرو۔
ماہ رنگ بلوچ سمی دین محمد نا عکس آتا پروپیگنڈہ نا حوالہ ئٹ پارے کہ دا وڑ ئنا پروپیگنڈہ تے آن ننا زالبول باسک آتے خاموش کننگ مفرو۔
سمی دین پاریسس کہ اونا پن ئٹ سوشل میڈیا ٹی تینٹ جوڑ کروکو عکس آتے شنگ کرسا اونا برخلاف نازیب و غلیظ ءُ پروپیگنڈہ مہم ئس چلیفنگءُ۔
سمی دین پارے کہ او وخت ہنا کہ اسہ زالبول ئسے خاموش کننگ کن اونا ذاتی زندگی آ اودے بلیک میل کننگ و کردار کشی نا حربہ ئے کارمرز کننگ مسکا، دا کنا ذاتی فیصلہ مسُنے کہ ای نقاب کرسا میڈیا نا مونا بروٹ ولے منہ بندغ آک اسہ زالبول ئسینا لحاظ ئٹ دادے کنا نزوری پوہ مس اسُر۔
سمی دین مونی پارے کہ دا جدوجہد ئٹی نن تینا زند آتا پرواہ ئے کتنُن۔
