ایڈووکیٹ عمران بلوچ نا رد ئٹ بلوچستان حکومت ڈاکٹر ماہ رنگ بلوچ و بیبو بلوچ نا 3 ایم پی او نا رد ئٹ برجاء دزگیری ٹی پین 30 دے ئنا ودکی کرینے۔
او پارے کہ تومکا تا 30 دے ئنا نظر بندی نا وخت پورو مننگ آن گڈ ایڈیشنل چیف سیکریٹری (ہوم) نا کنڈ آن اسہ پوسکنو نوٹیفکیشن ئس شنگ کننگانے، ہرا نا رد ئٹ اوفتا دزگیری نا وخت ئٹ ودکی کننگانے۔
خیال ئٹ مرے ہنوکا ہفتہ بلوچستان ہائی کورٹ ماہ رنگ بلوچ نا کیس ئے بِنگ و اونا ضمانت نا خواست ئے رد کرے و ودیک کارروائی کن سیکریٹری داخلہ بلوچستان ئے رادہ کرے۔
ہنوکا ہفتہ عدالتی کاروائی آن پد اینو ایڈیشنل چیف سیکریٹری داخلہ نا کنڈ آن شنگ کننگوک نوٹیفکیشن نا رد ئٹ، ڈاکٹر ماہ رنگ بلوچ و بیبو بلوچ نا نظر بندی نا وخت پورو مننگ آن گُڈ پین 30 دے ئنا ودکی کننگانے۔
یات مرے کہ بلوچ راہشون ڈاکٹر ماہ رنگ بلوچ و بیبو بلوچ ئے 22 مارچ 2025 آ شال ئٹی اسہ پرامن برانز ئسے نا وختا بلوچ یکجہتی کمیٹی نا ایلو سروک آتون اوار دزگیر کننگاسس، اوفتا برخلاف تھری ایم پی او (3MPO) نا رد ئٹ کیس کننگانے، ہرا کہ پاکستان ئٹ گیشتر سیاسی باسک آتے بیدس باقاعدہ ٹرائل آن دزگیر ئٹ تخنگ کن کاریم ئٹ ہتنگک۔
