بلوچستان نا ضلع دُکی ٹی سی ٹی ڈی نا کنڈ آن دروغ نا مونتس ئٹی پنچ بندغ ئے خلنگ نا دعویٰ کننگا۔ ولہ مونتس ئٹی خلنگوک بندغ آتیٹی اوار محمد دین مری نا حوالہ ئٹ شابیتی حوال آک مونا بسنو۔
محمد دین مری ئے چار تو مُست دسمبر 2024 ئٹ ضلع ہرنائی آن پاکستانی لشکر دزگیر کریسہ بیگواہ کریسس۔
اونا بیگواہی نا حوال ئے 19 جنوری 2025 آ بندغی حق آتا باسک و سوشل میڈیا ایکٹیوسٹ آک مونا ہیسوسُر۔ ہراکان پدا اونا آجوئی نا خواست ہم کنگاسس۔
اینو 19 اپریل آ سی ٹی ڈی دعوی کرے کہ دکی ٹی کاروائی نا وخت آ پنچ بندغ خلنگانو۔ ہرافتیٹی محمد دین مری نا چائنداری دا مونتس ئے اسہ دروغ نا مونتس ئس پاننگ نا بنیات تسنے۔
بندغی حق آتا تنظیم، سیاسی باسک و چاگڑدی حلقہ غاک ہم تدینی ئے شیف خلِسہ پارینو کہ بلوچستان ئٹی دہنو تدینی تا مننگ پوسکن او ہیت ئس اف۔
بندغی حق آتا تنظیم آک دہن انگا عمل تے بیدس قانود آن کوش پاریسہ دادے بنیاتی بندغی حق آتا لتّاڑ پارینو۔
دا مونتس ئٹی خلنگوک ایلو چار بندغ تا چائنداری مننگ کتنے واہم بندغی حق آتا ادارہ غاک ہندا خُلیس نا درشانی کننگ ءُ کہ کل بندغ آک بیگواہ مننگ کیرہ۔
