بلوچ نیشنل موومنٹ (بی این ایم) نا چیئرمین ڈاکٹر نسیم بلوچ بنگلہ دیش و پاکستان نا خارجہ سیکریٹری تا نیامٹ پانزدہ سال آن پد مروکا اولیکو اوڑدہی و بنگلہ دیش نا کنڈ آن 1971 نا جنگ ئنا وخت آ پاکستان نا تادی تیا معافی نا مطالبہ غا سوشل میڈیا غا ردعمل ترِسہ پارے کہ بنگلہ دیش 1971 نا ظلم تیا پاکستان آن السی بشخنداری خواہنگ ئٹ حق آٹے۔
او پارے کہ بنگالی تا زنگ کشی بیستمیکو کرن ئنا مون انگا سبخ آ تیان اسٹ ئس ءِ۔ ولے پاکستان آن داڑا ہچ وخت ہم ورندی ہلنگ متنے۔ دا استثنی اسہ خطرناکو مثیل ئس جوڑ کرینے۔
ڈاکٹر نسیم بلوچ نوشتہ کرے کہ بنگلہ دیش کن انصاف نہ مننگ نا سوب آن اینو پاکستان بلوچستان ئٹ ہم ہمو ڈوہ تے بھیرو کننگ ءِ۔ زورانسری بیگواہی، بیدس قانود خون، اشتماعی قبر، و اسہ تیبہ راج ئسے نا توار ئے توننگ کن نہاریئو مہم دائسکان برجاء ءِ۔
او ودیک پارے کہ حساب بیرہ ہنوکاتم ئکن آخہ بلکہ دیہاڑ ئے تینے بھیرو کننگ آن توننگ کن المی ءِ، پاکستان بائد ءِ نہ بیرہ بنگلہ دیش آن معافی خواہے بلکہ بلوچستان ئٹ برجاء زنگ کشی نا ہم ورندی ایتِہ۔
