بلوچستان نا ضلع پنجگور آن ہنوکا دے تیٹ بیگواہ کننگوک اِرا بندغ نا چائنداری مسونے۔
حوال تروک آتا رد ئٹ پاکستانی لشکر درو پنجگور نا ہند پروم ئٹی آپریشن بناء کرسا اُرا اُرا ئے پٹ و پول کرے و چُنا نیاڑی تتون اوار کیہی بندغ آتے دزگیر کرے۔
درو بیگواہ کننگوک آتیان پین ارٹ نا چاہنداری مسونے، ہرافتیٹ سمیر ولد ابراہیم تربت نا ہندی و نظام ولد حاجی عیسی تد ءُ۔سمیر تربت نا ہندی سے پروم ئٹی تینا سیال آتیا بسس اودے آپریشن نا وخت اونا ہمراہ سیف اللہ ولد مُراد تون اوار دزگیر کننگاسس۔
یات مرے کہ درو آن پروم ئٹی لشکر کشی برجاء ءِ و پاکستانی لشکر کیہی بندغ آتے دزگیر کرینے ہرافتیٹ دائسکان ہشت ئنا چائنداری مسونے۔
پروم ئٹی لشکر کشی و بندغ آتے زوراکی ئٹ بیگواہ کننگ نا برخلاف ہندی بندغ آک اینو اسہ برانزی ریلی ئس کشار، ہرا پروم آن بناء مرسا ایف سی کیمپ ئنا مونا برانز ئنا دروشم ئے ہرفے۔
آخری حوال اسکان دا وخت بھلو کچ ئسیٹی بندغ آک ہرافتیٹ زالبول و چُنا تا بھلو کچ ئس اوار ءِ ایف سی کیمپ ئنا مونا برانز کرسا توسنو۔
