بلوچستان نا ضلع کیچ ئنا بنجاہی شار تربت آن پسنی نا جہی بندغ ئسے نا جشوک جون خننگانے۔ اندن ڈیرہ بگٹی آن پاکستانی لشکر اسہ لیویز کارندہ ئس زوراکی ئٹ بیگواہ کرینے۔
پولیس آن رسینگوکا حوال تا ردئٹ استو ننکان گروک ڈور آن اسہ جون ئس خننگا ہرادے چائنداری کن ٹیچنگ اسپتال تربت آ رادہ کننگا۔
اسپتال ئٹ اونا چاہنداری نظر نا مار شیرخان پسنی وارڈ نمبر 1 ئنا جہی نا پن ئٹ مس۔
خیال ئٹ مرے کہ چھار دے مہالو سلاہ بند بندغ آک اودے ڈپو ئسے آن دزگیر کرسا بیگواہ کریسُر۔
ایلو کنڈ آن ڈیرہ بگٹی نا علاقہ سوئی گوپٹ آن پاکستانی لشکر فرنٹیر کور (ایف سی) لیویز کارندہ ستار بگٹی نا مار نواز علی ئے زوراکی ئٹ دزگیر کننگ آن گڈ بیگواہ کرینے۔
حوال تا ردئٹ نواز علی تینا ڈیوٹی آن گڈ اُراغا رادہ اس کہ اودے ایف سی نا کارندہ غاک کسر آن زوراکی ئٹ دزگیر کرسا بیگواہ کریر ہرانا دائسکان ہچو حوال افک۔
