چیئرمین غلام محمد بلوچ، بلوچ قومی تاریخ نا اسہ روشنو استار ئس ءِ۔ او اسکول ئٹی خوانینگ نا وختان بلوچ اسٹوڈنٹس آرگنائزیشن نا کاروان ئٹی اوار تما، بلوچ قومی جہد آجوئی نا بیرک ئے ارفے، مِزل نا کنڈا روان مسئک و گُڈیکو ساہ اِسکان پد کشیتو تینے۔ بی ایس او نا ہرا مسکوئی مُہی تہ اود تینا رہشون و سنگت سرپند مسس، جہد آجوئی نا دا مُرغُنا سفر ئٹی ہمو کل دم درینگار، آزات بلوچستان نا خواہنگان دُو ہفیر، کوزہ گیر پاکستان نا بیرک تون تینا سیاست ئے پھیڑ تِسُر و تفیرک بلہ چیئرمین واجہ غلام محمد بلوچ ہمو نگیگ آ سیاسی جاور تیٹی ہم نا اومیت متو، آجوئی نا مسخت، مول و مراد، و کسر ئے یلہ تِتو۔ او بلوچستان نا کُنڈ کُنڈ ئٹ، کراچی نا کوچہ کوچہ ئٹ دورہ کرے، آجوئی خواہوک بلوچ جہد کار، دانشور و سیاسی باسک آتون دیوان کرے، بلوچستان نا آجوئی کن اوفتہ بلوچ نیشنل موومنٹ نا پترا اسہ لڑ ئٹی خُلا۔ بی این ایم چیئرمین واجہ غلام محمد بلوچ نا سربراہی ٹی زوت بلوچ قوم ئٹی تینکن بھلو باورئس و مُخ تفی ئس ودی کرے، بلوچ نا آجوئی کن اسہ توان و ترندو توارئس، اسہ محکم سنگرئس جوڑ مسئک۔
چیئرمین واجہ غلام محمد بلوچ نا سروکی ٹی بی این ایم نا کوشست ئٹ بلوچ تحریک آجوئی نا جمہوری پِڑ ئنا کل، چنک و بھلن، بُر group تہ بلوچ نیشنل فرنٹ نا پتر آ یکمشت کننگا۔ بی این ایف ئے جوڑ کننگ، اودے جمہوری سیاسی پِڑ آ سلیفنگ چیئرمین غلام محمد نا فکری پختگی، مُر ہُننگ و دور اندیشی نا بَرم اسئک۔ واجہ غلام محمد تینا دور اندیشی، دلیری و آجوئی نا مول و مسخت تون بے کچھ ایمانداری ئٹ لس بلوچ مخلوق تون اوار بلوچ راجی رہشون سڑدار خیر بشخ مری و سڑدار محمد اکبر خان بگٹی نا است ئٹی تینکن بھلو شرف، اومیت و باورئس ودی کننگٹی سرسوب مسئک۔ بلوچستان نا آجوئی کن مُخ تفوک و سلاح بند سنگر ئے سنبھالوک آ سرمچار گل (organization) تا رہشون و باسک آتیٹی ہم چیئرمین غلام محمد بلوچ و اونا سروکی ٹی جمہوری پڑا آجوئی کن مُخ تفوک بی این ایم کن بھلو عزت و باورئس ودی مسئک۔
ہرا چنکا وخت ئٹی غلام محمد بلوچ تحریک آجوئی نا جمہوری سنگر ئے یکمشت کرے اونا ہمو کوشست و کڑدار کوزہ گیر پاکستان نا حاکم تا تُغ و آرام ئے جور کرے۔ پاکستان نا فوج و انٹیلیجنس آک مخ ئے تفیر غلام محمد بلوچ و بی این ایم نا پدٹ تمار، گام گام آ اوڑکن اڑ و جنجال ودی کننگ بناء کریر۔ چیئرمین غلام محمد بلوچ، اونا سنگت و باسک آتا زیہا دروغ ئنا تہمت خلنگ و کیس جوڑ کننگ، عدالت نا پیشی تیٹ اوفتہ خوار و فریشان کننگ ئے بِنا کریر۔ دسمبر 2006 ئٹی کراچی آن پولیس و انٹیلیجنس نا کارندہ غاک چیئرمین غلام محمد بلوچ ئے دزگیر کریر۔ دزگیری آن پد غلام محمد بلوچ ئے عدالت ئٹی دتور بلکنا 09 تُو اودے بیگواہ توریرک، عقوبت خانہ غا تیٹی اودے ذہنی و جسمانی آزار کریر، اودے تحریک آن نا اومیت کننگ، خُلیفنگ و پِرغنگ کن اوڑتون وڑ، وڑ ئنا چم کریر و ازیت تِسُرک تہ بلہ غلام محمد بلوچ او خاخر، تکلیف و تہارمئی تا آزمائش ئٹی سُرخ رو مسئک پیشتما۔ دشمن واجہ غلام محمد نا جوزہ، ہمت و ہاٹھی ئے پِرغنگ ئٹی بے سوب مسئک۔
واجہ غلام محمد بلوچ 09 تُوآن گُڈ قید آن پیشتما تو بلوچستان نا آجوئی کن جہد ئنا جوزہ تہ، اونا ہمت و ہاٹھی پین زیات اسئک ہراڑان قومی آزادی کن اونا جوزہ و کمٹمنٹ،اونا سما و سرپدی درشان مسئکہ۔ ریاستی عقوبت خانہ غاتا ازیت آک آجوئی نا مسخت آن دُو ارفنگ و پِزیر کشینگ کن اودے بیوس کننگ کتور۔ اود مُست آن گیشتر جہد ئنا پِڑا مُخ تفوک نت و دُو خلنگٹی اسئک۔ اونا سروکی ٹی زوت بی این ایم بلوچ تحریک آجوئی جمہوری پِڑ ئنا کلان بھلا آجوئی خواہوکا گل جوڑ مسئک۔ غلام محمد نا ہکل تان کوزہ گیر پاکستان نا حاکم و جرنیل تا، اوفتا دلال تا تُغ حرام مسس۔ چیئرمین غلام محمد ئے چُپ کرفنگ کن پاکستان نا کل ہُنر و حیلہ غاک بے سوب مسُر، پین ہِچ چم سُجھتو تا گُڑا غلام محمد بلوچ ئے کسران مُر کننگ کن اودے شہید کننگ نا فسطائی فیصلہ ئے کریر۔ 03 اپریل 2009 ئنا دے کیچ، تربت شہرئٹی واجہ کچکول علی ایڈووکیٹ نا دفتران پاکستان نا فوج چیئرمین غلام محمد بلوچ، لالہ منیر احمد بلوچ و واجہ شیر محمد بلوچ ئے دزگیر/ بیگواہ کرے، 09 اپریل 2009 ئنا دے تربت نا خُڑک مُرغاپ آن اوفتا جونک ٹھپی ٹُھری حالت ئٹی خننگار۔ دشمن ظلم و ازیت ئٹ اوفتے خُلیفنگ و پِرغنگ ئٹی بے سوب مننگ نا سوب آن ہنداخس خر آن پُر مسس کہ اوفتا بالادے سُم تیٹ بِروی کریسس۔
چیئرمین غلام محمد بلوچ تینا ایسری ساہ اِسکان نہ تو پشومان مسئک و پدی چک خلکک، نہ وخت ئس دم درینگا تُوسئک، نہ جہد ئٹی مسکوئی سنگت و رہشون تا نااومیتی و آجوئی نا مسخت آن دُو ہفنگ اونا جوزہ ئے نزور کرے نئے کہ کوزہ گیر ریاست نا جور و تعدی اودے نزور و لغور کننگ کرے۔ چیئرمین غلام محمد بلوچ دشمن نا خلنگ و کھسفنگٹ کھستنے بلکہ اینو ہم بی این ایم و آجوئی خواہوکا ہر بلوچ جہد کار نا دروشم ئٹی زندہ ءِ، جہدکار تا اونا کاروان اینو ہم آزادی نا مِزِل نا کنڈا مُخ تفوک روان ءِ۔ بیرہ ملک ئٹی نہ بلکہ مُچ جہان ئٹی اینو بی این ایم بلوچستان نا آجوئی کن چیئرمین غلام محمد بلوچ نا کُلہو ئے سر کننگ ءِ، جہان ئے بلوچ قوم تون مروکا ظلم و تعدی نا بارث چاہنداری تِننگ ءِ، بلوچستان نا زیہا پاکستان نا زورانسر کوزہ و بلوچ قوم ئنا زیہا اونا بیدادی تہ بے پڑدہ کننگ ءِ۔ چیئرمین غلام محمد بلوچ تینا میراث ئٹی بلوچ تحریک آزادی و وے خلوکو رہشون و جہد کار تا اسہ بھلو کچھ ئس اِلانے ہرافک بلوچستان نا کنڈ کنڈ ئے دشمن کن تِین کرینُرک، جہان نا کنڈ کنڈ ئٹی پاکستان نا پَت ئے پاش کننگرک، اونا منافقی، بلوچستان ئٹی اونا لُٹ ئہ پُل و بیدادی تہ بے پڑدہ کننگر۔ چیئرمین غلام محمد بلوچ، لالہ منیر احمد بلوچ، شیر محمد بلوچ و ایلو کل بلوچ شہید آتا، سیاسی و چاگڑدی جہدکار تا گؤندینگ آک پوک متنُر، اینو نا دا تاغتی آ و توان تحریک اوفتا قربانی تا مُز ءِ۔ اوفتا قربانی تا برم آزاد بلوچستان نا دروشم ئٹی بِسنگ ءِ۔
نوٹ: دا نوشت 10 اپریل 2025 آ زرمبش پبلیکیشنز نا کنڈ آن، شہید غلام محمد نا زند و کڑد ئنا زیہا شنگ مروک میگزین ئٹ اوار اس ہرادے اینو زرمبش براہوئی نا کنڈ آن شنگ کرسا نُمے سر کننگانے۔
