بلوچ آجوئی دوست راہشون اختر ندیم بلوچ چاگڑدی حوالکاری تلہ ایکس آ پاکستانی فوج ئنا سروک جنرل عاصم منیر نا دا زوت ئنا بیان آ ردعمل تس ہراٹی او پاریسس کہ “عسکریت پسند آتا بروکا دہ نسل ہم بلوچستان و پاکستان ئے ہچ کننگ کپک۔”
آجوئی دوست راہشون اختر ندیم پارے کہ پاکستانی جنرل آتا پیدواری ءِ دنو بھلو ہیت کننگ۔ ہراتم بنگلہ دیش نا آجوئی خُڑک اسک ہموتم ہم دا اندنو ہیت کننگ اسُر۔ اوفتا باء ٹی سرسوبی نا دعوی غاک اسُر و جنگ ئنا پڑ آ بےسوبی۔
او پارے کہ اینو بلوچ قوم نسل در نسل مزاحمت نا عزم کرینے، و بلوچستان ئٹی پنجابی لشکر نا حالیت ئے تیبہ دنیا خننگ ءِ۔
بلوچ راہشون ودیک پارے کہ عاصم منیر ہم براکاتم ئٹ تینا پیش روؤ تا وڑ اسہ ڈن ڈیہی جزیرہ ئسے نا خواجہ مننگ کیک ولے بلوچستان نا آخہ۔
او پارے کہ لس فوجی، ہرا بیرہ تنخواہ دار ءُ، او بائد ءِ کہ دا دتر نا سود کروک جرنیل و جنگی منافع خور آتیان بغاوت کیر۔ بلوچ الس اوفتے پرامن کسر تننگ کن تیار ءِ۔
