بلوچستان نا ضلع پنجگور نا علاقہ پروم ئٹ پاکستانی لشکر مُسہ ورنا دزگیر کننگ آن گُڈ زوراکی ئٹ بیگواہ کرے۔
شابیتی حوال تا رد ئٹ بیگواہ کننگوک ورناک جائین پروم نا جہی ءُ ہرافتا چاہنداری ظریف ولد رشید، اصغر ولد محمد علی و عطیق ولد محمد علی نا پن ئٹ مسنے۔
پن کروک ورنا تے اینو پاکستانی لشکر دزگیر کننگ آن گُڈ نادرستو جہہ ئس درینے، ہراکان گُڈ ہڑتُما تا ہچ حوال اف۔
خیال ئٹ مرے کہ تدوکا 24 ساہت ئٹ دائسکان ہفت بندغ پاکستانی لشکر نا دو آن دزگیری آن گُڈ بیگواہ کننگانو و مُسہ جشوک جون نال، بلیدہ و پسنی آن خننگانے۔
