بلوچ راجی آجوئی سنگر (براس) نا ترجمان بلوچ خان میڈیا ئے تروک تینا بیان ئٹ پارینے کہ براس نا سرمچارک نوشکی و بارکھان (چمالنگ) جلہو تیٹ کوزہ گیر پاکستانی لشکر نا 22 کارندہ مرگ ئنا گواچی کریر۔ دا جلہو تیٹ سرمچارک کوزہ گیر لشکر نا اسہ بنجائی کیمپ ئسے آ کوزہ کننگ ئٹ سرسوب مسُر و جھڑپ آتیٹ دشمن لشکر باء تس۔ دشمن تون جھڑپ آتیٹ ‘براس’ نا 5 سرمچار شہید مسُر۔
او پارے کہ نوشکی نا علاقہ گلنگور ئٹی یک شمبے نا نن بلوچ راجی آجوئی سنگر نا سرمچارک کوزہ گیر لشکر نا بنجائی کیمپ ئے جلہو ئٹ ٹک کریر۔ سرمچارک رکھ کروک چوکی (حفاظتی چوکی) تیا ساڑی دشمن کارندہ غاتے اسنائپر جلہو ئٹ مرگ ئنا گواچی کریر و ترند جلہو بناء کریر۔ نُہہ ئہ نیم آ بناء مروک جلہو یک بجہ اسکان برجاء سلیس، ہراڑے سرمچارک پن کروک کیمپ ئنا اسہ بشخ ئسے آ تیبہ کوزہ کننگ ئٹ سرسوب مسُر۔
دا نیامٹ ‘براس’ نا سرمچار تا ایلو دُھرک لیویز و کسٹم نا پوسٹ آتے ہم کوزہ کریر و کارندہ غاتے بندی کریر، و علاقہ ٹی دشمن لشکر نا کمک کن بروک گاڑی تا کاروان ئے سرمچار تا اسہ پین دُھر ئس مُست آن سنگر ہلِسہ جلہو ئٹ ٹِک کرے، ہرا نا بھرم ئٹ دشمن لشکر نا اسہ اُلاخ ئس تیبہ بُھس مس و پین مُسہ گاڑی جلہو نا دک ئٹ بسُر۔ سرمچارک لیویز و کسٹم کارندہ غاتے پدان یلہ کریر۔
جلہو تیٹ کوزہ گیر پاکستانی لشکر نا تیبہ17 کارندہ مرگ ئنا گواچی و کیہیک ٹپی مسُر و سرمچارک دشمن لشکر نا سلاہ و گولہ بارود آتے دوئی مسُر۔ بنجائی کیمپ ئنا "کلیئرنس” نا وختا بلوچ راجی آجوئی سنگر نا اِرا سرمچار سنگت نذر جان و سنگت رؤف دشمن لشکر تون جھڑپ آتیٹ شہید مسُر۔
ترجمان پارے کہ تدوکا دے تیٹ 9 اپریل آ بارکھان نا علاقہ چمالنگ ئٹ ڈڈر نا جہہ آ کوزہ گیر پاکستانی لشکر نا ڈرون جلہو آن گُڈ بلوچ راجی آجوئی سنگر (براس) نا سرمچار تا اسہ سائیڈ کیمپ ئسے آ بننگ نا کوشست کرے۔ سرمچارک تینا رکھ کن گھام ہرفِسہ ڈرون طیارہ آتا علاقہ آتیٹ ساڑی مننگ نا سوب آن جتا ٹولی تیٹ پیشتمار۔
او پارے کہ دشمن لشکر نا ڈرون ئنا ارٹمیکو جلہو ئٹ سنگت کبیر شہید مس، و زرس مُری آ دشمن نا کنڈ آن مسٹمیکو ڈرون جلہو ئٹ سنگت چراگ شہید و سنگت دُرّا ٹپی مسُر۔ دا وختا دشمن لشکر ہیلی کاپٹر تیٹ کمانڈو دھڑفے و مُستی بننگ نا کوشست کرے، ہراڑے سنگت دُرا ٹپی حالیت ئٹ دشمن لشکر تون جنگ تس و کم آن کم 5 دشمن کارندہ مرگ ئنا گواچی و کیہی تے ٹپی کرے، و سُم تا کُھٹنگ نا سوب آن ایسری سُم ئنا فلسفہ غا عمل کرسا تینا سُم ئے تینا پن آ کرے و شہید مس۔
اونا پاننگ اس کہ بلوچ راجی آجوئی سنگر (براس) نا شہید مروکا سرمچار تیٹ میران عرف نذر، یاسین عرف رؤف، عاقل ہاشمی عرف چراگ، غلام رضا عرف کبیر و محسن عرف دُرّا اوار ءُ۔
ترجمان بلوچ خان پارے کہ نوشکی، گلنگور ئٹی شہید مروکا سنگت میران عرف نذر جان ولد استاد سید نا تعلقداری ڈانڈل دل ءِ سر، شاپک آن اس۔ او بلوچستان یونیورسٹی ٹی فزکس ڈیپارٹمنٹ نا پنچمیکو سمسٹر نا خوانندہ اس۔ او بلوچ لبریشن آرمی نا سرمچار ئس اس۔ او 2022 آن قومی غلامی نا برخلاف سلاہ بند جہد بناء کرے و شاری گوریلا نا وڑ تینا ذمہ واری تے سر تس۔ داکان مُست او کوزہ گیر پاکستانی لشکر نا دو آن زوراکی ئٹ بیگواہ کننگا، ہراڑے کیہی دے اسکان دشمن نا ٹارچر سیل تیٹ اوڑا بیدادی کننگا۔ اونا اسہ ایلم کمال جان عرف گُلاب ہم قومی آجوئی نا کسر آ فروری 2022 ئٹ دشمن لشکر نا دو آن ڈرون جلہو ئسیٹ شہید مس۔
او پارے کہ شہید سنگت میران عرف نذر جان 2022 ئٹ مش آ بس۔ او شور پارود، نوشکی و خاران نا محاذ آتیا تینا ذمہ واری تے سر تس و تینا جنگی لائخی و گشاد نا سوب آن بھاز کم وخت ئٹ کیمپ کمانڈ گچین کننگا۔ او دشمن نا برخلاف کیہی آپریشن تیٹ سرسوبی دوئی کرے۔
او ودیک پارے کہ نوشکی، گلنگور ئٹ شہید مروک ارٹمیکو شہید سنگت یاسین عرف رؤف ولد رحیم بخش نوشکی نا علاقہ کیشنگی آن تعلقداری تخاکہ۔ او 2022 ئٹ قومی غلامی نا برخلاف جہد کن بلوچ لبریشن آرمی ئٹ اوار مس۔ اسہ سال اسکان او شاری گوریلا نوشکی شار و ہیب ئہ کھیب ئٹ دشمن ئے بھلو دک خلک، پدان 2023 ئٹ مش آ بس، ہراڑے شور پارود، نوشکی و خاران نا محاذ آتیا تینا لائخی تے کاریم ئٹ ہتسہ دشمن ئے مِش تا کرے۔ سنگت یاسین تینا جنگی لائخی تا سوب آن گشتی کمانڈ گچین کننگا۔ او دے و نن دشمن ئے دک خلنگ ئٹ اختہ اس۔
ترجمان پارے کہ چمالنگ ئٹ شہید مروک سنگت عاقل ہاشمی عرف چراگ عرف پروفیسر ولد ہاشم نا تعلقداری کیچ ئنا علاقہ شاہرک آن اس۔ او 2020 ئٹ بلوچ لبریشن آرمی ئٹ اوار مس و قومی غلامی نا برخلاف جہد ئٹ بشخ ہلک۔ داکان مُست او بلوچ اسٹوڈنٹس آرگنائزیشن ئٹ اوار مرسا بلوچ ورنا تے قومی آجوئی نا بابت ئٹ چائندئی تس۔
او پارے کہ بولان، بارکھان، چمالنگ و کوہ سلیمان نا محاذ آتیا تینا ذمہ واری تے سر تروک سنگت عاقل عرف چراگ انٹرنیشنل اسلامک یونیورسٹی اسلام آباد آن پولیٹیکل سائنس ئٹ ایم فل کریسس۔ شہید سنگت عاقل عرف پروفیسر چراگ بی ایل اے نا خاص ٹولی فتح اسکواڈ نا یونٹ کمانڈر نا ذمہ واری تے سر تننگ اس۔ او نہ بیرہ اسہ گچینو گوریلا جنگجو ئس اسک بلکہ اونا اٹکل آن ایلو سرمچارک ہم سواد ہرفیرہ۔
اونا پاننگ اس کہ چمالنگ ئٹ شہید مروک ایلو سنگت شہید غلام رضا عرف کبیر ولد علی گل نا تعلقداری خاران نا علاقہ راسکوہ ٹی ہولنگی تنک آن اس۔ راسکوہ نا دامن ئٹ بھلن مروک غلام رضا 2022 آن بلوچستان لبریشن فرنٹ تون اوار اس و شاری گوریلا جنگ ئنا بشخ مرسا قومی غلامی نا برخلاف جہد کریسس۔ اسہ سال ئسے آن او بارکھان نا محاذ آ اسک۔ شہید سنگت رضا قومی آجوئی نا شعور تخوک اسہ اُست سفاؤ و مہروانو سنگت ئس اسک۔ او بارکھان نا کیہی محاذ آتیٹ دشمن ئے مِش چٹفیسس۔
بلوچ خان بیان ئٹ ودیک پارے کہ چمالنگ ئٹ شہید مروک مسٹمیکو سنگت محسن عرف دُرّا ولد میار نا تعلقداری تربت نا علاقہ گلشن آباد آن اسک۔ او 2023 ئٹ بلوچ لبریشن آرمی ٹی اوار مس و شاری گوریلا جنگ ئٹ بشخ ہلک۔ اسہ سال اسکان تربت شار و ہیب ئہ کھیب ئٹ دشمن لشکر ئے بھلو دک خلنگ آن گڈ او 2024 ئٹ مش آ بس۔
اونا پاننگ اس کہ سنگت محسن بارکھان نا محاذ آ راجی غلامی نا برخلاف تینا ذمہ وارے تے سر تننگ اسک۔ او سخت انگا حالیت آتیٹ فیصلہ ہلنگ نا لائخی تخاکہ ہرا نا درشانی ئے او دشمن نا دو آن دزگیر مننگ نا جاگہ غا تینا سُم ئے تینٹ کُننگ نا وختا کرے۔
ترجمان ایسر ئٹ پارے کہ بلوچ راجی آجوئی سنگر (براس) نا سرمچار تا گوئندینگ آک و جلہوک بلوچ قومی آجوئی نا پھاش کلہو ایترہ۔ دا سرمچارک نی بیرہ دشمن لشکر نا برخلاف دلیری نا درشانی کریر بلکہ دا ہیت ئے ثابت کریر کہ بلوچ قوم تینا آجوئی نا جہد آن پدی مروف۔
