بلوچستان نا علاقہ پسنی، تربت و منگچر آن پاکستانی لشکر پین مسِہ بندغ دزگیر کننگ آن گُڈ بیگواہ کرے۔
شابیتی حوال تا رد ئٹ ضلع گوادر نا علاقہ پسنی ٹی پاکستانی لشکر سی ٹی ڈی نا کارندہ غاک اسہ اُرا ئسے آ چھاپہ خلِسہ اسہ ورنا ئسے دزگیر کننگ آن گُڈ بیگواہ کریر۔
بیگواہ کننگوک ورنا نا چاہنداری سخی بخش نا مار شوکت نا پِن ئٹ مسُنے ہرا پسنی نا علاقہ ببر شور نا جہی ئس ءِ۔
حوال تا رد ئٹ شوکت ئے 14 اپریل نا نن دزگیر کننگ آن گُڈ بیگواہ کننگانے۔
ہندا وڑ منگچر نا جہی ماہ دیم بلوچ پارینے کہ کنا ایلم سلال ولد ڈاکٹر نصیر احمد ئے اینو پاکستانی لشکر نا کارندہ غاک ننا خاہوت نا مون آ زوراکی ئٹ بیگواہ کرِسہ ننے فریشانی ٹی شاغانو۔
او پارے کہ ریاست نا زوراکی نا انتہا ئے ہُربو کہ ریاست مون پہ مون خاہوت آتیا جلہو کننگ ئٹی ءِ۔ کنا ایلم سیکنڈ ایئر نا خوانندہ ئس ءِ ہرادے بیگواہ کننگانے۔
تربت آن رسینگوک حوال تا رد ئٹ اینو 15 اپریل 2025 سوب ئنا 1 بجہ غا پاکستانی لشکر بلوچستان نا ضلع تربت نا علاقہ جوسک آن شیر خان نظر ئے دزگیر کننگ آن گُڈ نادرستو ہند ئسے آ درینے۔ خاہوت اونا سرسلامت آجوئی نا خواست کرینے۔
