لیاقت زہری نا خاوت اسلام آباد ئٹی بلوچ یکجہتی کمیٹی نا برانز ئٹی اوار مرِسا لیاقت زہری نا آجوئی نا خواست ئے کرے ۔
حوالکارنا رِد ئٹ 17 نومبر 2023 آ بلوچستان نا ضلع خضدار زہری آن پاکستانی لشکر نا دُو آن دزگیر کننگ آن پد زوراکی ئٹ بیگواہ مروکا لیاقت زہری ولد صالع محمد نا خاوت اسلام آباد آ بس و بیگواہ آ بندغ آتا برانز ئٹی اوار مرِسا لیاقت زہری نا آجوئی نا خواست ئے کریر ۔
خاوت نا رِد ئٹ لیاقت زہری اسہ دکان دار اسک او زہری نا مُر ءُ ہند ئسے آ تینا دکان آ توسس ۔منہ لاری تون ایف سی و ڈھکوک آ ادارہ آتا کارندہ آک دکان آ چھاپہ خلسا لیاقت زہری ئے تینتون دریر اوکان پد اونا بابت ننے ہچو حوال ئس رسینگتنے ۔
لیاقت زہری نا خاوت پارےکہ نن ہندی پولیس آ تینا فریاد ئے درین ولے اوکان ننے ہچ ئس رسینگتو ۔ نن بلوچستان ئٹی بیگواہ آ بندغ آتا تنظیم آتے حال تِسُن و لیاقت نا زوراکی ئٹ بیگوائی نا حوال آتے تِسُن ۔
بیگواہ آ ورنا نا خاوت خواست کرے اگان لیاقت زہری آ دوبہ ئس ارے اودے مونا ہتریر و عدالت آ پیش کیر و سزا تیر یا لیاقت زہری ئے آجو کیر خاوت ئے پین اذیت آن رکھیفر ۔
لیاقت زہری نا خاوت حکومت و بندغی حق آتا ادارہ تیتون خواست کرے کہ لیاقت زہری نا زوراکی ئٹ بیگوائی نا حوالہ ئٹ پاکستانی ادارہ تے سوج کیر و لیاقت زہری نا زندگی نا رکھیفنگ کن تینا کڑدئے ادا کیر ۔
