بلوچستاب نا بنجائی شار شال آن اِرا بندغ و ضلع کیچ ئنا بنجائی شار تربت آن اسہ بندغ ئس پاکستانی لشکر نا دو آن بیگواہ کننگانے۔
حوال تا رد ئٹ شال آن تعلقداری تخوک اِرا ورنا پاکستانی لشکر ہموتم بیگواہ کرے ہراتم او پکنک آن واپس اُراغا بننگ اسُر۔
شال ئنا جہی محمد ظاہر شاہوانی نا مار محمد یاسر پارینے کہ کنا ایلم محمد مدثر تینا سنگت مدثر ولد منظور تون اوار سبی آ ہناسس و 11 مارچ آ واپس بننگ اس ولے دائسکان او اُراغا سر متنو۔
ایلو کنڈ آن آواران جہی بندغ ئس پاکستانی لشکر تربت آن بیگواہ کرینے۔
بیگواہ کننگوک بندغ نا چاہنداری آواران آہوری نا جہی قادر بخش نا مار اشرف نا پن ئٹ مسنے ہرادے پاکستانی لشکر 29 مارچ آ تربت نا ہند جوسک آن ہموتم بیگواہ کرے ہراتم او "کوہ ءِ مراد” آ زیارت کن ہناسس و واپس اُراغا بننگ اس۔
