بلوچ اسٹوڈنٹس آرگنائزیشن مستونگ ہنکین نا پارہ غان، بلوچستان نیشنل پارٹی نا کنڈ آن برجاء تولوک برانز نا جہہ آ، چلتن نا دامن لکپاس ئٹ "علم ئنا چراغ” نا پن ئٹ اِرا دیئی بک اسٹال و لائبریری اڈ تننگا۔
بک اسٹال ئٹ سیاست، دیہاڑ، فلسفہ و فکشن تون اوار ایلو سرحال آتیا کتاب آک بیرہ 100 روپی نا ارزان آ نہاد آ رسینگ ءُ۔
بی ایس او نا درشان نا رد ئٹ اینو 13 اپریل آ، اولی دے آ برانزیک و علم دوست آ الس بھلو کچ ئسیٹی اسٹال آ بسر، کتاب ہلکر و لائبریری ٹی خوانِسہ تینا علم و چائند ئے ودیفیر۔
بی ایس او نا پارہ غان “علم ئنا چراغ” نا پن ئٹ کتابی کاروان نا ذریعت ئٹ بلوچ چاگڑد ئٹی علم و شعور تالان کننگ نا جہد مننگ ءِ، بلوچستان ئٹی بک اسٹال خلنگ و کتاب آتیٹ علم و شعور بشخنگ نا لڑ برجاء ءِ۔
او پارے کہ پھگہ عارضی لائبریری و بک اسٹال نا گڈیکو دے ءِ، امیت ءِ کہ برانزی تیتون اوار ہندی بندغ آک ہم بھلو کچ ئسیٹی کتاب ہلِسہ خوانور۔
یات مرے کہ درو 12 اپریل آ، برانز جاگہ غا بلوچی و براہوئی زبان تیٹ ساز و زیمل نا مجلس اڈ تننگاسس، ہراٹی پنی آ فنکار استاد عبدالخالق فرہاد و پروفیسر نوشین قمبرانی بسوسرُ۔
