بلوچ یکجہتی کمیٹی (بی وائی سی) نا کنڈ آن تنظیم نا راہشون ڈاکٹر ماہ رنگ بلوچ، صبغت اللہ شاہ جی، بیبو بلوچ و بیبگر بلوچ تون اوار ایلو باسک آتا دزگیری و ریاستی زوراکی تا برخلاف یک شمبے، 13 اپریل آ تیبہ بلوچستان ئٹ برانزی ریلی اڈ تننگا۔
ملیر، شال، دالبندین و حب چوکی تون اوار ایلو علاقہ آتیٹ برانز آتے توننگ کن ریاست نا کنڈ آن تاغت کاریم ئٹ ہتِسہ برانز آتے توننگ نا کوشست کننگا و برانزی تیا سمکاری کننگا۔ اندن کیہی برانزی تے دزگیر ہم کننگا۔
تیبہ بلوچستان ئٹ اڈ ہلوک برانز آتیٹ اُلس بھلو کچ ئسیٹی اور مس۔ برانزیک بی وائی سی نا سروک و باسک آتا آجوئی نا خواست کریر۔ دا وختا برانزیک تینا دو تیٹ بینر و پلے کارڈ ہرفیسُر۔ برانزیک حکومت نا برخلاف نعرہ ہم خلکُر۔
برانزیک پاریر کہ سیاسی باسک آتا دزگیری و زوراکی نا بیگواہیک تحریک آتے توننگ کپسہ۔ او پاریر کہ ریاست تاغت نا زور آ حق ئنا توار تے توننگ نا کوشست کننگ ءِ ولے بلوچ قوم تینا حق آ سلوک ءِ۔
برانزیک خبڑدار کریر کہ اگہ دزگیر کروک راہشون تے آجو کننگتو تو نن برانز آتا پلویڑ ئے پین بھلن کرون۔
