بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا اسہ بیان ئسیٹی پارینے کہ بی ایل ایف نا سرمچارک 12 اپریل آ ویگ ئنا 4:20 بجہ نا خُڑک بارکھان و رکھنی نا نیامیکو علاقہ ٹی موٹر سائیکل آتیا سوار پاکستانی لشکر نا کاروان آ "آئی ای ڈی” بم ئٹ جلہو کریر۔ جلہو ئٹی اسہ موٹر سائیکل ئس تیبہ بُھس مس و اوڑا سوار اِرا کارندہ ہمو جہہ آ مرگ ئنا گواچی مسُر ہندن اِرا موٹر سائیکل ئے مچِٹ نسخان رسینگا۔
او پارے کہ قومی آجوئی نا دا جنز ئٹی تاغت نا بنیات اُلس ءِ۔ بی ایل ایف اُلس ئنا تاغت و مُخ تفی آ باور کیک و ننے ہندا خوئشی ءِ کہ بلوچ قوم آجوئی نا دا جنز ئٹی تینا سرمچار آتون ہم کوپہ ءِ۔
ترجمان پارے کہ بلوچستان لبریشن فرنٹ بارکھان ئٹی پاکستانی لشکر آ جلہو نا ذمہ واری ئے ہرفِک و بلوچ قوم ئے دا باور ایتک کہ بلوچستان آن دشمن ئے تیبہ کشنگ اسکان کوزہ کروک لشکر آ ترندو جلہو کرِسٹ کرون۔
