مرگاپ نا تدینی بیدس ہچو شک آن اسہ قومی تدینی ئس ءِ ولے شہید آتا سدخئیک نہ بیرہ دشمن آتا چم آتے بےسوب کرینو بلکہ مون ہڑسوک آتے ہم پاش کرینو۔ دا سدخئیک جنز ئے پین سوگوی و جوانو کُنڈ ئس بشخانو۔ بی این ایم
بلوچ نیشنل موومنٹ (بی این ایم) نا چیئرمین ڈاکٹر نسیم بلوچ مرگاپ نا شہید آتا رد ئٹ اسہ اڈ ہلوک مچی ئسیٹی تران کرسا پارے کہ پاکستان نا غلامی ٹی گدرینگوک 77 سال ئٹی، مسہ پُشت ریاست نا زوراکی و کوزہ تون مون ترِسا کرینو۔ ہندا سدخئیک شعور تخوک، سوگو و نظریاتی ہمگرنچی تخوک باسک آتے ودی کرینو۔
مرگاپ نا تدینی بلوچ قومی جنز ئے اسہ پوسکنو تاغت ئس بشخانے، و دا راستی پاش مسنے کہ شہید آتا سدخئیک دشمن و اونا کمکار آتا ارادہ غاتے مِش تا کرینو۔
بنجاہی مُچی آن بیدس شہید راشد مشکے (آواران ہنکین) و شہید انور ایڈوکیٹ (کیچ گوادر ہنکین) نا کنڈ آن ہم مرگاپ نا شہید آتا یات ئٹ مچی اڈ تننگا۔ دا مچی تیٹی بی این ایم نا چیئرمین ڈاکٹر نسیم بلوچ تون اوار جونیئر وائس چیئرمین بابل لطیف، سیکریٹری جنرل دلمراد بلوچ، حوالکاری و دود ربیدئی سیکریٹری قاضی داد محمد ریحان، بنجاہی فنانس سیکٹری ناصر بلوچ، بنجاہی کمیٹی نا بشخ چیف اسلم بلوچ، سی سی باسک ماہ گنج بلوچ، تلار ناز و ذیشان منان تران کریر۔
تران کروک آک پاریر کہ منہ پِنیئو بندغ جنز آن مون ہڑسیسہ بی این ڈی پی (بلوچستان نیشنل ڈیموکریٹک پارٹی) آن بار ا ِنگا پوسکن ودی مروک پارٹی تیتو اوار مسر۔ اسہ ہندنو جماعت ئس ہرا بی اے پی (بلوچستان عوامی پارٹی) نا وڑ ئٹ ننوئی نن جوڑ کننگ مس۔ شہید غلام محمد اوفتا برخلاف مُخ ئے تفِسہ بلوچ قومی جنز ئنا رکھ ئے کرے۔ اونا سدخئی و بے مثیل انگا جوزہ اونا سنگت آتے سودا بازی و مات کننگ آن رکھا۔ اوفتا است آتیان خُلیس ئے کشا و اوفتے جہد ئے برجاء تخننگ نا حوصلہ تِس۔
بی این ایم نا سروک آک گیشتر تران کرِسہ پاریر کہ شہید آک نہ بیرہ پیشن نا دشمن نا برخلاف بلکہ تنظیم نا تہٹی ہم ہمو بندغ آتا برخلاف توار ہرفیر ہرا بلوچ نا قومی مفاد آتا برخلاف کاریم تیٹی اوار اسُر۔ شہید غلام محمد تینا ساہ آن ہیچ ہرفِسہ قوم ئے باور تس کہ او اسہ مون ہڑسنگ ئسے نا آخہ بلکہ کھل مون ہڑسوک آتا برخلاف جنز ئے سوگو کننگ ئٹی ءِ۔ اونا دا فیصلہ جنز و قوم ئنا بروکاتم ئنا کسر ئے پاش کرے۔
او پاریر کہ شہید غلام محمد بی این ایم ئے ہندا سوب آن برجاء تخا کہ مون ہڑسوک آ بندغ آک بلوچ نا ٹیوار ئے ایسر کننگ کن ریاست نا شڑت آتیا کاریم کریرہ۔ طبیب اصغر و طبیب اکبر نا سوداک ہندا مسخت نا رد ئٹ مسوسُر، و اوفتا مونٹی ٹی "بی این ایم” نا ساڑی مننگ بلوچ قومی پجار و بقاء نا رکھ ئنا چیدہ اسک۔ فدا احمد ئے شہید کرسا مون ہڑسنگ نا کسر ئے صاف کننگ نا کوشست کننگا۔ ولے غلام محمد فدا احمد نا فکر ئے دوئی کرسا آجوئی نا جنز ئنا صاف کلہو ئے تس۔
تران کروک آک ہندا گڑا غا زور شاغار کہ ہرا قوم آک تینا آجوئی نا جنز ئنا بناء ئے کیرہ او اسہ دے ئس سرسوب مریرہ۔ دا اسہ وخت ہلوک و صبر خواہوکو سفر ئس ءِ۔ ولے دانا ایسر سرسوبی ءِ۔ سروک آک سدخہ مریرہ ولہ جنز ئنا سفر برجاء مریک۔ شہید آتا سدخئی نا سوب بلوچ جنز تینا مزل نا کنڈ آ ہِننگ ئٹی ءِ۔ و اوفتا فکر و فلسفہ ننا کسر شونی ئے کننگ ئٹی ءِ۔
مرگاپ نا شہید آتا یات ئٹی اڈ ہلوک مچی ٹی بی این ایم نا کاریم تا است جمی نا درشانی کننگا و پاننگا کہ بی این ایم ہر اسہ شعبہ ٹی دیمروی کرسا بلوچ نا قومی آجوئی نا مزل ئے خڑک کننگ ئٹی ءِ و اسہ سوگو و ہر کنڈ آ تالانو کڑد ئس سَر تِننگ ئٹی ءِ۔
