بلوچستان لبریشن فرنٹ نا ترجمان میجر گہرام میڈیا ٹی شنگ کروک تینا بیان ئسیٹی پارے کہ 9 اپریل آ نن ئنا 10:40 منٹ آ انٹیلیجنس معلومداری تا بنداو آ بی ایل ایف نا قربان یونٹ نا سرمچارک کاروائی کرسہ پولیس موبائل آ جلہو کریر ہراڑان سب انسپکٹر عبدالولی تنوئی تون اوار مُسہ کارندہ مرگ ئنا گواچی مسر و پین ارٹ ٹپی مسر۔
او پارے کہ سرمچارک خلنگ مروک اِرا پولیس کارندہ نا سلاہ تے ہم تینتون دریر۔
ترجمان ودیک پارے کہ کوئٹہ پولیس تدوکا دے تیٹ بلوچ زالبول و چُناتا بیگواہی، دزگیری، بیدادی و دو ہورک آ بلوچ آتا لس خون ئٹ تُد مسنے۔
او پارے کہ بی ایل ایف اینو میڈیا نا ذریعت ئٹ پِڑو کیک کہ پولیس ئٹی ساڑی بلوچ مخالف بندغ آتتون ہم کوزہ گیرلشکر نا وڑ روشت تخنگ مرو، و انٹیلیجنس معلومداری تا بنداو آ اوفتا برخلاف جلہو تا لڑ پین ترندی ئٹ برجاء مرو۔
ترجمان نا پاننگ اسک کہ نن بلوچ قوم آ مروک ظلم و تادی، لس خون ئنا بدل ئے آجوئی نا دروشم ئٹ ہلون۔ و دشمن تاغت ئے ہر محاذ آ ورندی ایتون۔ ننا مزل بلوچ قومی آزادی ءِ۔ و دا جنگ بلوچ قوم ئنا آزادی ئسکان برجاء مرو۔
او ایسر ئٹ پارے کہ بی ایل ایف دا جلہو نا ذمہ واری ئے ہرفک و بلوچستان نا آزادی ئسکان کوزہ گیر لشکر، فوجی ماڑی ئہ مڈی و دشمن نا کمکار تے ٹک کرون۔
