بلوچ یکجہتی کمیٹی نا کنڈ آن بیان ئسیٹ پاننگانے کہ اوفتا زالبول باسک گل زادی بلوچ ئے سی ٹی ڈی نا نرینہ کارندہ غاک بیگواہی نا وختا سخت بیدادی نا گواچی کننگ آن گُڈ ہُدہ جیل آ ہیسُنے۔
بیان ئٹ پاننگا کہ گل زادی بلوچ ئے ملخدو ننکان سی ٹی ڈی و پولیس ہشت بجہ نا وختا دزگیر کریسس، و کیہی ساہت اسکان اودے بیگواہ کننگاسس و اونا ہچو حوال الو۔
بی وائی سی نا کنڈ آن دا حوال مونا بسنے کہ گل زادی بلوچ ئے درو دوانزدہ بجہ نا وختا کوئٹہ ہُدہ جیل آ ہتنگ آن مُست اوڑا سی ٹی ڈی نا نرینہ کارندہ غاک سخت بیدادی کرینو۔ اوڑا کیہی ساہت اسکان لٹ کُٹ و بیدادی کننگانے۔
او پاریر کہ اسہ زالبول باسک ئسے تون دنو بے بندغی روشت ریاست نا بلوچ سیاسی باسک آتا برخلاف خُلیس تالان کننگ نا کوشست نا اسہ بشخ ئس ءِ۔
ودیک پاننگا کہ ننا باسک آتا برخلاف غُٹ بیدادی تا ذمہ وار ریاست ءِ، ریاست نا دا فاشسٹ آ چم بازیک ننا تحریک ئے توننگ کروفس۔
