بیگواہ کننگوک چراغاک، فہیم بلوچ و خادم بلوچ

نوشت: سُمعیہ بلوچ

زرمبش براہوئی

بیگواہی بیرہ ہیت ںٔس اف دا باز بھلو دڑد، ڈُکھ و ویل ئس ءِ۔ لمہ ںٔسے نا وداری آ خن تا بیوسی ںٔس ءِ، ایڑ ںٔسے نا خڑینک و پراد ئس ءِ، باوہ ںٔسے نا ودار و زہیری ںٔس ءِ۔ بیگواہی نا دڑد ئے بیرہ ہمو خاہوت سرپند مننگ کیک ہرا نا اُرا نا روژناںٔی ئے پُلر، ہرا نا دڑد ںٔٹ ہمو اُرا تہار ءِ۔ ولے دا دڑد بیرہ ننا دڑد اف اینو تیوہ بلوچستان نا ہر اُرا اندا بیگواہی نا خاخر نا گواچی مسنے اندُنکہ بلوچ راج ئنا ہر اُرا ٹی بیرہ لوز بیگواہ بنِنگ کن مِلک ہر خاہوت نا دو تیٹ بیرہ اوفتا ورنا تا عکس آک خننگرہ۔

اینو راج ئنا ہر اُرا ٹی خڑینک چہیانٹ و پراد آک ءُ۔ ورناک اندا پاکستان نا ظلم و زوراکی تا گواچی مننگ ءُ، ظالم نا ہمو تہار آ کوٹی تیٹی تینا زیبا غا زند ئے بیوسی ٹی تیر کننگ ءُ۔ اندُن فہیم بلوچ و خادم بلوچ ہم اینو اندا ظلم و بیگواہی نا گواچی مسُنو۔ ہڑتُما ورناک تینا اُرا نا ہمو چراغاک ءُ ہرا تیان بیدس اُرا تہار ءِ۔ فہیم بلوچ و خادم بلوچ ایف ایس سی نا خوانندہ ءُ ہراتے 15مارچ آ نن ئنا 1 بجہ نا وخت شال بورڈ آفس نا مون آن پاکستانی لشکر دزگیر کرِسہ تینا ہمو موننگا کوٹی تیٹ بندی کرے۔ اوفتا تعلیم ہم شال ئٹ برجاء اس ولے دا ظالم آ ریاست ننا خوانندہ غا ورنا تے تینا ظلم ئنا گواچی کیک اوفتا دو تیان کتاب آتے پُلک، اوفتے تہارمہ غا کوٹی تیٹ بندی کیک، راج ئنا ہر ورنا ہمو ظالم نا تہار آ کوٹی تیٹ تینا زند ئے بیوسی و بزگی ٹی تیر کننگ ءِ، دا ظالم نا دو آن کس خوئشی کے تو امر کے۔ دنکہ فہیم و خادم عید ئنا خوشی تے ںٔٹ اُرا آن سر الکور شار ئکن کہ دا ظالم اوفتے بیگواہ کرے ہرافتا اینو اسکان ہچو حوال اف کہ او اَرانگ ءُ انت حالیت ںٔٹی ءُ۔ اینو بیرہ ننا خاہوت تون دا ظلم مننگ اف دا بلوچ راج ئنا ہر خاہوت تون مننگ ءِ۔ اینو بیرہ فہیم و خادم کن نن وداری افن بلکہ بلوچ راج ئنا ہر خاہوت اندا دڑد ئے سہنگ ءِ۔

نن کن عئید بیرہ عئید ںٔس اف ،ننے ہچ سماء تمتو عئید امر تدینگا عںٔید خوئشی نا دے ںٔسے یک جاہ مروک او دے ںٔسے ولے ننا عئید ماتم آن کِیشتر ںٔس بیرہ ننا ایلم تا یات آک اسورہ خنک خڑینکی بے وس تولوک وداری تینا ایلم تے کن کہ اوفتا گپ و بشخندہ تے کن۔ ای دا سر پند اُٹ کہ اینو دا حالیت ننا اف دا مچا بلوچ راج ئنا ءِ دا دڑد بیرہ ننے آ بتنے دا دڑد ءِ راج ئنا ہر خاہوت سہنگ ءِ اگہ خوئشی تے بیگواہ کننگے او گُٹ گیر کننگےگڑا او خاہوت انت عئید ئس کرو او بیرہ تینا ورنا تے کن وداری مریرہ نی امو لمہ نا دڑد ئے اَرف ہرانا خنتا رژنائی پلنگانے، نی امو باوہ غان اَرف ہرانا است ئنا بند آتے بندی کننگانے، نی ارف امو ایڑ آن ہرا ایڑ نا دے تیٹ تینا ایلم کے اُروکو، نی اَرف امو خاہوت آن ہرا نہ سُہب ئے چارہ نہ نن ئے۔ عئید گڑا نن ہمر عئید آتے آخوئشی کینہ دا زالم ننا عئید آتے بیگواہ کرینے ہمو تہار مئی تا بندی کرینے ننا عئید بیرہ خڑینک ںٔٹ تدینگا، تیوہ غا بلوچستان ںٔٹی عید اندون گدرینگا، دنکہ ننا عید اسک ننا بیگوہ غا ایلم تیان بیدس۔

دا ریاست ننا ایلم تے تہارمئی تا گواچی کرینے ہچ سماء اف دیچہ اُوفتون انت انت بے دادی کننگ ءِ سماء اف فہیم و خادم تینا لاغر آ جون آ تون دا زالم ناامر بے دادی تے سہنگ ءُ۔ سماء اف ایلمک لنگڑ ملاس مرور سماء اف نن ام نما یات آ برون سماء اف اوفتا استا انت تدوئے سماء اف او لمّہ کن زہیری مرور سماء اف باوہ نا مہر اوفتا استا برو سماء اف نم دا ظلم و بیدادی تے امر تینا جون آ سہورے سماء اف دا بے پت آ ظالم پین اٹ دے نمے بندی کرو۔ سماء اف ایلم نم ٹک خلگ مرورے کہ ننا خاہوت نن کن اخس گڑتی ئٹ مرو سماء اف نم چپ تولوک تینا زند ئنا جواننگ آ وخت آتے یات کننگ اُرے سماء اف ایلم نم ظالم نا امو تہار آتے ںٔٹ تینا سنگتاتا گپ آتے اُست آ ہتسہ بشخندہ اُرے یا کہ زالم نا بے دادی تا مونا تینا لمہ غاتا خڑینک آتے خننگ ارے سماء اف نم کن اخس کُبین مرو امو تہارمئی۔ سماء اف نم کن امر امو تہار آ شام امر مننگ ءِ، ایلم ننا ہوش و خیال ئٹ بیرہ نم پِیری کیرے بس بیرہ نما یات آک ءُ لمہ غا تا خڑینکی آ خنک ءُ، نم کن درگہ غا سلوک وداری ءُ۔

بیگواہی اسہ اندنو دڑد ئس ءِ ہرا ہچو وڑ ئسیٹی درشان مننگ کپک۔ اسہ جیجا ئسے نا است خان ئے کسس اوڑان زوراکی ئٹ پُھلے، اودے زندان تیٹی بند کے اوڑا بیدادی کے اودے ظلم ئنا زنجیر تیٹی اختہ کے اودے سال آ تا سال گم و گار کے گڑا امو لُمہ نا اُست ئنا دڑد ئے دیر ئس بیان کننگ کیک۔

بیگواہی پاننگ کن تو بیرہ اسہ لوز ئس ءِ ولے دا لوز ئٹی بھاز آ گڑاک اودیم ءُ ہراتے بیرہ امو خاہوت آک سرپند مننگ کیرہ ہرا تا رژن ہنگا چراغ آک بیگواہی نا گواچن ءُ۔ دا لوز ئٹی دڑد، ویل، ڈکھ، آڑسندہ، مودہ، پراد، چیہانٹ و غم جہی ءِ، ہرا دے و نن اسہ ہیڑ ئسے نا خن تیان خڑینک نا درشم ئٹ وہیرہ، اسہ باوہ ئسے نا خن تا ڈیک ئنا ارمان نا دروشم ئٹ بریرہ، ہرا باوہ تینا مڷ ئکن بھاز بھلو تغ تکّاسس کہ کنا مڷ بھلن مریک خوانک اسہ مزل ئسے آ سر مریک کنے آ آہڑ نا باسُن دے تیٹ اسہ سیخا ئس مریک، ولے ہرا وخت کہ اونا خن تا دیدہ ئے ظالم بیگواہی نا گواچن کیک اودے تہار آ کوٹی تیٹی بندی کیک گڑا دا غٹ خوائش آک امو باوہ نا اُست ئٹی چیہانٹ نا دروشم ئٹی بریرہ۔ و مدام ہیڑ ئسے نا است آن آسرد ئسے نا دروشم ئٹ پیشتمرہ، ہرا غٹ خوئشی تے غم ئنا دروشم ئٹی مٹ کیک۔

نما بیگواہی آن گُڈّ خلق ویران ءِ، نن تون اوار مُچا آلم نما بننگ کن بے جارات ءِ، خلق ئنا اسہ اسہ بندغ نم کن وداری ءِ۔ ایلم نما سنگت آک نم کن اُروک ءُ، لمہ غاتا خمب ئٹی نما عکس آک بیوسی ئٹ تخوک ءُ، اوفتے نن ئنا تغ اف بیرہ نم کن ارُوک ءُ۔ نما بیگواہی آن پد ننے اُرا وڑننگ اف ولے دا ظالم ئے پاںٔک لمہ نا زہیری و تینا ورنا تیکن لمہ غاک نما یات آتے اُست آن دننگ کپسہ و مچا خاہوت نم کن زہیری ءِ۔ سماء اف فہیم و خادم نمے دا ظالم اَرا تہار آ کوٹی تیٹ بندی کرینے۔ ہراڑے نما ہچ درک اف، ولےنم ہم اندن وداری مرورے ہمو تہار آن پشتمنگ کن ایلم زو ںٔس آجو مریرے۔ مدام خدا نا باہوٹ مریرے۔