بلوچستان نا ضلع آواران نا تحصیل مشکے آن زوراکی ئٹ بیگواہ کننگوک مُسہ بندغ نا جونک اسہ ویران ئسے آن خننگانو، اندن اسہ پین بندغ ئس پاکستانی لشکر نا دو آن زوراکی ئٹ بیگواہ کننگانے۔
حوال تا رد ئٹ پاکستانی لشکر نا دو آن زوراکی ئٹ بیگواہ کننگوک مُسہ بندغ دروغ ئنا مونتس ئٹ خلنگانو۔ کہوکا ورنا تا چائنداری حضور نا مار ظہور، جلال نا مار شاہنواز، و عیدو نا مار حبیب نا پن ئٹ مسنے۔
حوال تروک آتا رد ئٹ ظہور و شاہنواز ئے درے نن مشکے نا ہند شردوئی آن زوراکی ئٹ بیگواہ کننگاسس، و حبیب ئے بیست دے مُست مشکے نا ہند تراتدان آن زوراکی ئٹ بیگواہ کننگاسس۔
ہندی حوال تا رد ئٹ مُسٹ انگا ورناتے بےقانودی دزگیر کننگ آن گڈ دروغ ئنا مونتس ئٹ خلنگانے و اوفتا جون تے ویران تیٹی خسنگانے۔
اندن پاکستانی لشکر مشکے تنک ئنا جہی محمد حسن نا مار حاصل ئے درو کیمپ ئٹ خواہیفسہ بیگواہ کرینے۔
حوال تا رد ئٹ، حاصل ئے دا مسٹمیکو وار ئے کہ بیگواہ کننگانے۔ اولی وار 26 اپریل 2024 آ دزگیر کرسہ بیگواہ کننگاسس ہرانا برخلاف خاہوت برانز ہم کریسس۔
ہندی حوال تا ردئٹ حاصل بیست دے مُست پاکستانی لشکر نا ڈکھوک ادارہ غاتا دزگیری آن آجو مسس ولے اسہ وار ولدا اودے بیگواہ کننگانے۔
یات مرے کہ مشکے نا ہیب ئہ کھیب ئٹ تدوکا تُو ئٹ کیہی بلوچ ورنا تے بیگواہ کننگانے و 12 ورنا ئے دروغ ئنا مونتس ئٹ خلنگانے۔
